Министерството за правда ја започна постапката за екстрадиција на расчинетиот владика на Македонската православна црква, Зоран Вранишковски, кој минатата недела беше уапсен на бугарско – српската граница, потврдуваат од министерството

Според постапката за екстрадиција, согласно Законот за кривична постапка и Европската конвенција за екстрадиција, откако МВР испрати известување до Министерството за правда дека распопот Зоран Вранишковски е лоциран, Министерството за правда почна да ја прибира  целокупната документација за Вранишковски од судовите.Документацијата треба да се преведе и да  се испрати до бугарското Министерство за правда.  Потоа следува барањето за екстрадиција на Вранишковски.Министерката за внатрешни работи, Гордана Јанкулоска вели дека од оценката на документацијата ќе зависи, на која земја лицето ќе биде предадено.„По однос на лицето кое беше приведено пред извесен период на границата добивме првична информација дека му е одреден притвор така што зависно од комплетирањето на документацијата, односно оценката на таа документација, очекуваме дополнителни информации како понатаму ќе се води случајот, односно на која држава лицето ќе биде предадено“ изјави Јанкулоска.Вранишковски беше уапсен, минатата недела, на 15 ноември на граничниот премин Колотина, на бугарско-српската граница. По 24-часовното задржување, му беше одреден екстрадиционен притвор од 72 часа. Бугарското обвинителство во саботата му одреди куќен притвор на Вранишковски. Куќниот притвор е неограничен за да може властите во Скопје да ја подготват документацијата за екстрадиција. Во целата постапка се остава простор, Вранишковски да го искористи своето српско државјанство. Тој се бара по меѓународна потерница распишана од македонското Интерпол Биро по налог на битолскиот суд кој го осуди на 2,5 години затвор за проневера на 250.000 евра црковни пари.