По аминувањето од страна на Заев и Филипче на владина седница за кусокот 2.000 тони жито вреден 800.000 евра, Љупчо Николовски веќе следната година му возвраќа на својот ментор со грант од 1,4 милиони евра, средства од ИПАРД програмата, вели Валентин Манасиевски, член на ЦК на ВМРО-ДПМНЕ.

„Компанијата „Тргопродукт’’, која е една од најпознатите фирми во сопственост на Заеви, во тогашната 2022 година, добила грант вреден 1,4 милиони евра. За граѓаните да им биде појасно, станува збор за познатиот бренд на Заеви, „Мамас’’.

Уште по сомнително е тоа што овој грант во вредност од близу 87 милиони денари или 1,4 милиони евра, тогаш бил втор најголем грант во историјата откако се работи со ИПАРД програмата.

Ги прашуваме Заев и Љупчо Николовски, дали станува збор за меѓусебен договор, откако Заев му аминува кусок од државните стокови резерви во вредност од 800.000 евра државни пари, а тој продаден завршува на црниот пазар во соседна држава по скоро двојно повисока цена? Дали Љупчо Николовски како тогашен министер преку своето влијание помогнал да Заеви добијат неповратен грант од ИПАРД програмата вреден 1,4 милиони евра? Уште колку вакви тендери и договори имаат направено овие луѓе? Дали можеби конечно и обвинителството и судството ќе се одважат и да ги проверат овие случаи“.

Според Манасиевски, менторот Заев, како што вели, добро ги обучил Љупчо Николовски и Венко Филипче да бидат негово продолжение на политичката сцена.

Манасиевски оценува дека народот веќе еднаш му пресуди на Зоран Заев, а сега му пресуди и на Венко Филипче.

„Се додека овие корумпирани и криминални ликови не се оттргнат од партијата, таа ќе продолжи да пропаѓа секојдневно“.

Камерите во Скопје забележале речиси 110.000 прекршоци во сообраќајот за 24 часа. Министерот за внатрешни работи Панче Тошковски рече дека повеќето од нив се однесуваат за пречекорена брзина на возење.

Министерот исто така посочи дека правилата ќе важат за сите, дури и за функционерите, и никој нема да биде поштеден ако направи прекршок. Рече и дека системот „Безбеден град“ има слабости и дека остануваат отворени за секакви решенија што ќе придонесат за намалување на бројот на жртви во сообраќајот.

„Речиси 110.000 за 24 часа само за Скопје, катастрофална бројка. Приближно 1.000 прекршоци се за нерегистрирани возила, речиси 5.000 за поминување на црвено, а најстрашно е што над 90 отсто или повеќе е за пречекорување на брзината“, истакна Тошковски.

Тој уверува дека секој функционер што ќе направи прекршок ќе биде казнет.

„Најодговорно тврдам – ниеден функционер во рамките на редовното вршење на своите јавни работи, ако стори прекршок, ќе биде казнет“, рече тој и додаде дека нема да има селективен пристап за никого и никој нема да биде поштеден.

Министерот исто така рече дека најмалку тројца шофери на министри се веќе казнети, но не сакаше да ги открие имињата на министрите. Појасни дека се казнети со запирање од страна на полициски службеник, а не преку „Безбеден град“.

Во врска со странските возачи, Тошковски рече дека ниту странските возила нема да бидат исклучени.

„При излез од Македонија не може да бидат спречени да излезат во согласност со законот, но ќе бидат информирани дека нема да им биле дозволен влез во Македонија доколку нема да ја платат казната“, рече Тошковски.

Вчера, почна пробниот период на проектот „Безбеден град“, кој ќе трае еден месец, а од 1 јануари 2026 ќе почне и казнувањето.

Општина Ѓорче Петров денеска го означи стартот на изградбата на новата детска градинка во урбаната заедница Дексион.

На настанот присуствуваа и претседателот на Владата, Христијан Мицкоски и заменик-министерот за социјална политика, демографија и млади, Ѓоко Велковски.

Објектот е со површина од 900 м² со капацитет од 120 деца. Рокот за изградба е две години, а инвестицијата на општината изнесува 81.964.479,19 денари со ДДВ.

Објектот, како што е соопштено, е проектиран според највисоки европски стандарди за безбедност, пристапност и енергетска ефикасност, со занимални, голем централен хол, современа централна кујна, целосна пристапност за лица со попреченост, детски игралишта, зеленило, урбана опрема, топлински пумпи и соларен систем за пониски трошоци.

– Континуирано вложуваме во образованието, раниот детски развој и создавање современи, безбедни и достоинствени услови за најмладите жители на Ѓорче Петров. Со овие проекти градиме иднина која е стабилна, квалитетна и насочена кон семејствата и децата – истакна градоначалникот Александар Стојкоски во изјава за медиумите.

„Новиот објект во Дексион е уште еден чекор во насока на подобрување на условите за предучилишна возраст, а градинката која исто така е во изградба, а со локација во Стопански Двор е показател дека нашата визија е секое дете во Ѓорче Петров да има пристап до современи и квалитетни услови за растење и учење“.

Стојкоски за наредните четири години најави уште три вакви објекти.