Времето утре ќе биде променливо облачно со повеќе сончеви периоди во источните делови. Ќе дува слаб до умерен ветер од јужен правец, информира УХМР.

Во вечерните и ноќните часови ќе има повремени врнежи од дожд, а на планините и на некои повисоки места од снег. Во западните делови врнежите повремено ќе бидат поинтензивни и проследени со засилен југозападен ветер.

Минималната температура ќе биде во интервал од -7 до -1, а максималната ќе достигне од 5 до 11 степени.

Во Скопје прoменливо облачно со сончеви периоди и со слаб до умерен ветер од јужен правец. Во ноќните часови ќе има повремени врнежи од дожд. Минималната температура ќе се спушти до -3, а максималната ќе достигне до 7 степени.

В сабота претпладне ќе има повремени врнежи од дожд, а на планините и на некои повисоки места од снег. Во текот на денот ќе биде сончево со мала до умерена облачност и со слаб до умерен, а по должината на Повардарието засилен северозападен ветер. Потоа во следните денови времето ќе биде променливо облачно со повремени врнежи претежно од дожд, пообилни в недела попладне.

Во последните 24 часа во Македонија се потврдени 336 нови случаи на коронавирус, 10 лица починаа, а 385 се оздравени, соопшти Министерството за здравство.

Направени се 1.964 тестирања. Најмногу нови случаи се потврдени во Скопје – 145, во Кавадарци се потврдени 27 случаи, Охрид – 25, Прилеп – 17, Тетово – 15, Куманово – 13, Велес – 13, Битола – 12, Делчево – 10, Струга – 10, Гостивар – 7, Гевгелија – 5, Берово – 5, Струмица – 4, Ресен – 4, Радовиш – 4, Кичево – 3, Свети Николе – 3, Неготино – 3, Крива Паланка – 2, Пробиштип – 2, Македонска Брод – 2, Крушево – 2, Демир Капија – 2, Кочани – 1.

Регистрирани се 385 оздравени пациенти, и тоа од: Скопје – 213, Прилеп – 27 , Куманово – 23, Кавадарци – 23, Тетово – 17, Велес – 15, Штип – 12, Кочани – 9, Дебар – 7, Крива Паланка – 5, Радовиш – 5, Битола – 4, Кичево – 4, Гостивар – 3, Берово – 3, Демир Капија – 3, Свети Николе – 2, Гевгелија – 2, Пробиштип – 2, Кратово – 2, Охрид – 1 , Неготино – 1, Македонски Брод – 1, Крушево – 1.

Починати се 10 лица – пет пациенти од Скопје (53, 61, 81, 84 и 86), по еден од Кавадарци (72), Гостивар (61), Кочани (49), Охрид (83) и Прилеп (68). Сите пациенти се починати во болнички услови.

Досега во земјата се направени вкупно 449.995 тестирања на Ковид-19.

Вкупната бројка на ковид-дијагностицирани во нашата земја од почетокот на епидемијата изнесува 91.891, бројката на оздравени пациенти е 80.393, на починати е 2.831, а бројот на активни случаи изнесува 8.667.

Уште две лица се приведени за случајот „Јавна соба“, соопшти министерот за внатрешни работи, Оливер Спасовски. Со двете нови лица бројот на досега приведени за овој случај е четворица.

Двајца од приведените се од Битола и по едно лице од Велес и од Штип.

„Се работи на откривање кој ја креирал ваквата група и кои сѐ биле членови. Секој што се наоѓа во групата ќе се истражи и ќе понесе кривична одговорност“, објави министерот Спасовски на „Фејсбук“.

Попладнево беа уапсени првите две лица, едно од Битола и едно од Велес, а кусо по апсењата, „Јавна соба“ почна да се полни со една иста порака, во која администраторот ги известува членовите дека е отворена нова група и ги повикува да му пратат приватна порака за да им ја испрати.

Премиерот Зоран Заев ги повика членовите да излезат од групата оти МВР ќе ги добие податоците и сите ќе бидат обвинети и ќе одговараат за она што го прават. Премиерот рече дека побарале од „Телеграм“ да ја избрише групата „Јавна соба“, а доколку од таму не одговорат на барањето, најави дека ќе ја блокира апликацијата не поради цензура, туку за заштита на граѓаните.