Дводневниот состанок на мешовитиот парламентарен комитет Македонија – Европска Унија финишираше со препораката за што поскоро отпочнување на пристапните преговори на земјата со Европската Унија, соопштуваат од македонското Собрание.На состанокот биле разгледани повеќе прашања поврзани со односите Македонија – ЕУ, како што се неодамнешниот развој на граѓанското општество, учеството на граѓаните во процесот на одлучување, слобода на изразување и политички дијалог, потоа ситуацијата на функционирањето на јавната администрација, судството и затворскиот систем, вклучувајќи ги и обидите во борбата против измами и корупцијата, за транспортните коридори во Западен Балкан и Европската унија, како и за управувањето со фондовите на ЕУ, економската и финансиската ситуација и реформите преземени од Владата во насока на обврските преземени со пристапувањето во членство во Европската унија.„Ставовите на Македонија околу препорака за почнување на преговори со ЕУ, како и оние за  пречката што ја претставува спорот за името речиси 100 отсто беа поддржани од страна на европарламентарците. Мешовитиот комитет препорача дека процесот на македонската евроинтеграција не смее да чека и дека Македонија треба да биде примена заедно со Хрватска. Во однос на името ставовите на Мешовитиот комитет кореспондираа со македонските национални ставови. Тоа го покажува фактот што тројца грчки европарламентарци беа воздржани. Мислам дека остваривме навистина добар заклучок за Македонија“, изјави Александар Спасеновски, ко-претседавач на мешовитиот комитет од македонска страна.Во рамки на осмиот состанок на мешовитиот комитет, свое обраќање денеска имаше и вице-премиерот задолжен за европски прашања, Васко Наумовски. /крај/со/ач