Со Предлог програмата за развој 2011-2013 година се претставени визиите и главните проекти за кои ќе треба повеќегодишно финансирање, а се потребни за граѓаните, рече на денешната седница на градскиот совет, градоначалникот на Скопје, Коце Трајановски. Градоначалникот од целосната програма спомна дел од проектите кои ги смета за покрупни приоритетни проекти. Меѓу нив се најдоа воведувањето на географски информативен систем, дигиталната архива, интегрираниот информативен систем, донесувањето на генералниот урбанистички план на Скопје како и воведувањето на современи методи за следење и потрошувачка на уличното осветлување.„Во приоритетните проекти кои ќе бидат финансирани од неколку буџети сакам да ги издвојам реконструкцијата и проширувањето на булеварите Македонска војска, Србија, Илинден, Првомајска, како и изградбата на Христијан Тодоровски Карпош, кој целосно ќе се заврши доколку имаме помош од Владата, како и претворање на улицата Митрополит Теодосиј Гологанов во булевар“, рече градоначалникот Трајановски. Трајановски најави дека тендерот за изградба на мостот во Сарај ќе биде објавен во март или април 2011 година. Градоначалникот додаде  дека оваа година ќе се направи и реконструкција на многу мостови и надвозници, но нема да изостане и реконструкцијата на фасадите, ревитализацијата на езерото Треска, на Вардариште, како и на училишните згради и спортски сали. /крај/бс