Франција не сакала да ја притиска Грција за спорот со името пред одржувањето на самитот на НАТО во Букурешт во 2008-ма година, покажува доверлив документ од американската амбасада во Париз објавен на Викиликс (Wikileaks)

Документот говори за средба меѓу Џозеф Вуд, заменик-помошник на потпретседателот за Национална безбедност, Филипе Ерера, советник на шефот на француската дипломатија  и Франсоа Ришер, советник на францускиот претседател одржаната на 16-ти јануари 2008 година во Париз, неколку месеци пред самитот во Букурешт.На неа, меѓу другото, Вуд разговарал со Ерера и Ришер за Македонија, Хрватска и Албанија, земји што во тој момент беа кандидати за членство во алијансата.Ерера, според документот, порачал дека Франција немала намера да ја притиска Грција во однос на спорот со името и побарал од САД сериозно да ја сфатат Грција во однос на овој спор.„Ерера рече дека Владата на Македонија ја потценува сериозноста на прашањето за името за Грција и дека САД не би требало да ја прави истата грешка. Франција нема да ја притиска Грција за ова прашање. Понатаму, ако Атина попушти во прашањето за името би можела грчката влада да падне, а тоа би довело до нова влада која би била одговорна за – и очекувано негативно настроена кон – процесот за ратификација на проширувањето на НАТО“, се вели во доверливиот документ.Ова е втор документ објавен од страна на Викиликс во врска со спорот со името. Вчера беше објавен документ според кој на средба меѓу американски и француски дипломати било заклучено дека „доколку меѓународната заедница може да ја убеди Македонија да ја напушти идејата за референдум и да ја убеди Грција да ја напушти намерата да се менуваат пасошите, тогаш може да се случи прогрес во преговорите“.