По повод државниот празник Св. Климент Охридски, денеска беше откриен и осветен споменикот со ликот на просветителот и прв епископ, во близина на Соборниот храм и на почетокот на булеварот што го носат неговото име.

Статуата е изработена од бронза и е висока околу 4,70 метри. Стои на постамент од гранит висок 1,20 метри.

Споменикот го освети архиепископот охридски и македонски г.г. Стефан кој во име на Македонската православна црква се заблагодари што непосредно до Соборниот храм ќе стои и споменик со ликот на Свети Климент.

Автор на споменикот е скулпторот Томе Серафимовски, кој рече дека ликот на Свети Климент е секогаш неисцрпна личност и оти е предизвик за секој вид уметност, за скулпторите, сликарите, писателите и композиторите.

„Тој е неисцрпен предизвик и инспирација. Над 40 години ја работам преродбата и духовноста. За разлика од Св. Климент во Охрид, кој држи дел од Охрид и го благословува градот, овој треба да ги благослови скопјани и сите кои ќе дојдат во Скопје“, истакна Серафимовски.Споменикот е изработен во познатата белградска леарница „Јеремиќ“, во која се излиени многу препознатливи спомен-обележја во Србија, меѓу кои и „Победникот“ на Калемегдан во Белград.

Скулптурата на Св. Климент Охридски е инвестиција на општина Центар и нејзиниот вкупен износ е 185.000 евра, со кои се покриени сите трошоци.

Градоначалникот на општина Центар Владимир Тодоровиќ рече дека овој споменик ќе биде единствен на бул. „Св. Климент Охридски“. Тој најави дека следни за поставување во центарот на градот се споменикот „Гемиџии“ покрај Вардар, „Бранители“ во паркот „Жена-борец“, „Карпошово востание“…

За споменикот на Александар на плоштадот „Македонија“, Тодоровиќ посочи дека градежните работи на фонтаната би требало да завршат напролет./крај/бд