Приближување на бизнисот до образованието е главната цел на денешната работилница наречена „Вештини за вработување за 21 век“ која ја организира компанијата Сивус. Втората по ред работилница на која присутствуваа 45 средношколци главно беше фокусирана на трасирање на кариерата на младите луѓе во однос на комуникациски и презентациски вештини, вештини за преговарање, тимска работа, креирање на концепти за видео и стратешки игри. „ Она што денеска го видоа беше презентација на индивидуално планирање на кариера, како да размислуваат за трасирање на својата кариера, како да напишат ЦВ како да се подготват за интервју, како да бараат работа на интернет и на социјалните мрежи, да видат кои се карактеристиките на еден успешен човек. Да им помогнеме да се насочат во високото образование во студиските програми и насоки на Електротехничкиот факултет. Освен тоа имаа можност да се запознаат со андроид апликацијата и гејминг департментот на Сивус“ – рече за Макфакс Весна Ивановска од тренинг центарот на Сивус. Според Ивановска она што најмногу недостасува во редовното образование е насочување на учениците во нивната идна професија „ Праксата недостасува и во средното и во високото образование. Сивус се труди тоа да го понуди, со тоа што овозможуваме пракса за студенти од Електротехничкиот факултет и од Природно Математичкиот факултет, да знаат кои се насоките во кои се движи технологијата, што значи да се биде програмер и да се работи тимски“ – додаде Ивановска. Работилницата „вештини за вработување за 21 век“ е продолжение на летната школа која се одржа во месец август во Крушево на која учествуваа ученици од цела Македонија  вклучени во проектот Пеп на УСАИД, кои покажуваат интерес за информатичката технологија. крај/к.с