Пратениците од опозицијата денеска со метли во рацете побараа разрешување на министерката за култура Елизабета Канческа-Милевска заради, како што велат, неодговорно и расипничко владеење и нечесно и скандалозно однесување

„Нема никаков политички и морален кредибилитет да ја извршува својата функција и затоа треба да се разреши. Го претвори Министерството за култура во царство на расипништво и криминал, во министерство за перење на пари“, рече пратеникот Игор Ивановски од СДСМ, кој ја образложи интерпелацијата поднесена од пратеничката група на неговата партија.Тој потсети на аферата „Патриотска метла“, случај кој беше отворен минатиот месец и посочи дека исчезнување и уништување тендерска документација е прв скандал од  овој тип  во земјава.„Тоа е мега афера за перење пари зашто смислено биле поништени тендери за јавни набавки за да се прават непосредни договори“, обвини  Ивановски.Според него, станува збор за криминално однесување кое предизвикува и финансиски импликации, за што, како што рече, говори и фактот дека е уништена дел од тендерската документација и за седум важечки тендери. „Во Министерството за култура свесно е уништена дел од тендерската документација за милионските тендери од „Скопје 2014“. Мотив за тоа е злоупотребата на огромните суми народни пари“, додаде Ивановски.Министерката Канческа-Милевска рече дека Ивановски клевети и ја манипулира јавноста „со груби невистини и лаги“ и дека неговите тврдења биле демантирани и од МВР.„МВР потврди дека нема никакви финансиски импликации од направениот пропуст, ниту, пак, е исчезната финансиска документација и финансиски договори со милионски суми, со кои господинот Ивановски бесправно ја манипулира македонската јавност за исчезната документација од 20 милиони евра. МВР ги потврди ставовите на Министерството за култура дека немало ниту налог, ниту решение за посочените документи да бидат уништени и ги демантираше клеветите на СДСМ за сомнителни намери“, рече министерката за култура.Таа додаде дека сите 14 предмети, не биле од времето додека таа е министер и оти не ги спровела тие постапки.Заблагодарувајќи и се на опозицијата за поднесената интерпелација, Милеска рече дека со тоа добива можност да даде отчет за досега сработеното и ги спореди инвестициите во културата од оваа Влада и во времето на СДСМ, набројувајќи ги проектите во сите сегменти и дејности на културата.„Културата за првпат зазеде важно место во една Влада. Тоа е во Владата на Никола Груевски, никогаш досега, додека вие бевте на власт, не обрнавте внимание на културата. Сега за првпат културата не е маргинализирана како што беше во времето на СДСМ“, рече Канчевска – Милеска.Собраниската расправа за интерпелацијата на министерката за култура е уште во тек и се очекува дека за истата ќе се гласа вечерва.