Регионалната соработка, периодот по самитот на НАТО во Лисабон и состојбата во Авганистан беа во фокусот на состанокот на Партнерската Комисија на Повелбата за партнерство, одржана денеска во Скопје.Покрај учеството на петте земји членки на Повелбата и САД, на состанокот беа поканети Србија и Косово. Властите во Приштина ја прифатија поканата, додека од Белград единствено дошол одговор дека нивни претставници нема да учествуваат на денешниот состанок во Скопје.„Би сакал да истакнам од македонска страна дека ова беше добра прилика да бидат поканети и двете соседни земји, Косово и Србија. Сметаме дека е добра можност на вакви едни регионални форуми да се разговара заеднички за стабилноста на регионот, но и за имиџот на регионот како една заедничка цел и приоритет. Задоволни сме што имаме претставник од владата во Косово и се надеваме дека за време на следните претседателства ќе имаме прилика на заедничка маса да имаме претставници и од Косово и од Србија“, изјави Антонио Милошоски, министер за надворешни работи на Македонија. „Јас искрено се надевам дека во периодот кој е пред нас, полноправно членство ќе биде обезбедено и за Србија и за Косово во рамки на Јадранската повелба“, изјави Милан Роќен, шеф на црногорската дипломатија.Претставниците на Македонија, Албанија, Босна и Херцеговина, Хрватска и Црна Гора  разговараа за зајакнување на цивилното присуство во Авганистан, кое би било во насока на пренесување на одговорноста на авганистанските власти за безбедноста во земјата. „Присуството во Авганистан не е доволно само во една воена и безбедносна форма, туку дека многу е потребно секоја земја која што има капацитет да го зајакне своето цивилно присуство или присуство со обучувачи на авганистанската полиција и армија во следниот период. Главната цел не е само постигнувањето на поголема стабилност во одредени кризни подрачја, туку главната цел е една трансформација, пренесување на главната одговорност за безбедноста на Авганистан на нивните безбедносни сили“, изјави Милошоски.Американскиот амбасадор Филип Рикер, потсетувајќи се на неодамна починатиот дипломат Ричард Холбрук, рече дека тој бил среќен да види ваков собир во регион на кој посвети дел од својата кариера. „Тој беше голем пријател на овој регион и мислам дека тој би бил многу трогнат денеска да го види овој собир во регион на кој посвети толку многу од својата работа и го наметна своето лидерство низ годините за да донесе мир и просперитет на овој дел од Европа и истовремено, да ги имаме овие претставници да дискутираат за придонесување за безбедноста во Авганистан и мисијата ИСАФ таму, регион на кој амбасадорот Холбрук се посвети толку многу во последните години“, изјави Рикер, кој ја напушти заедничката прес-конференција пред нејзиното завршување.Шефот на албанската дипломатија, Едмонд Хаџинасто, од своја страна, изрази надеж дека Македонија што поскоро ќе стане полноправен член на НАТО. „Го изразивме нашето уверување дека новото црногорското претседателство ќе биде исто така успешно и ќе одбележи постигнување на прогрес на сите земји од целиот регион кон повисоки параметри на мир, стабилност и развој“, изјави Хаџинасто. Предвидено е во првата половина на 2011-та година Црна Гора од Македонија да го преземе претседателството со Повелбата. /крај/ач