Околу 15 лица во петокот навечер во Скопје започнаа 24-часовен штрајк со глад за неменување на името на Македонија

Огранизирани во новоформираното Здружение за неменливост на името Македонија, штрајкувачите велат дека основна и единствена цел на штрајкот е непромена на името на земјата, на јазикот и на идентитетот. „Има една стара поговорка ‘Помогни си сам, за да ти помогне Господ’. Или Кенеди во една прилика им рече на Американците ‘Не се прашувајте што државата направила за вас, туку што вие сте направиле за држава’. Јас како Македонец, чие вековно потекло и по мајка и татко е македонско, сакам својот дел во заштита на името да го направам, да партиципирам во таа борба за задржување на нашето име“, вели Борис Видески, еден од организаторите на штрајкот.Предупредуваат дека во текот на следната година ќе следува и втор, 48-часовен штрајк со глад, но и трет кој временски нема да биде ограничен. Убедени се дека ова ќе резултира со неменување на името на Македонија. „Ние имаме визија за сево ова и затоа го правиме. Ова ќе вроди со плод, со истрајност и името нема да се промени“, вели Видески.Штрајкот се одржува во Градската библиотека „Браќа Миладиновци“, каде учесниците се под постојан медицински надзор.