Предлагачите на предлог измените на Законот за лустрација велат дека со новото пошироко решение ќе се одговорат илјадници отворени прашања од поновата историја и оти лустрацијата ќе се врати во институциите

„Со измените и дополнувањата на Законот за лустрација сакаме да направиме еден вистински процес на просветлување на нашето општество и да знаеме кои се оние луѓе кои можат да прават пречки на демократскиот развој на земјата и да се тргнат од таму да остават простор на вистинските демократски сили да ја водат Република Македонија напред“, рече на денешната трибина на институтот „Павел Шатев“, пратеничката Силвана Бонева.Лустрацијата, како што рече таа, треба да покаже какво е учеството на тајните служби, каква била нивната улога во креирање на меѓуетничките тензии во Република Македонија, во креирањето на тензии со соседите, како што рече, се со една и единствена цел, да се покаже дека Македонија не може да биде самостојна, независна држава, која може сама да се избори во своето место во Европа и во светот.Ивица Боцевски од ЛДП рече дека не е добро на Македонија да и се ставаат негативни налепници дека само таа е специфична земја поврзана со процесот на лустрација.„Сенките од поранешниот систем ги измачуваат сите посткомунистички земји, па и оние што се веќе членки на ЕУ и НАТО и овој процес не го правиме за да овозможиме побрза интеграција во овие организации, туку го правиме за нас, за да се исчисти Република Македонија од сенките кои сè уште го загрозуваат безбедното демократско функционирање и да оневозможиме некој друг повторно да навлезе во вакви влијанија кои ги имаме во моментот“, посочи Боцески.Авторот на Еднооки, Борис Дамовски смета дека треба да се спроведе лустрација во делот на економијата, на како што рече, кражбата на 30 милијарди евра во процесот на приватизација во периодот од 1990 до 1996 г.„Сè додека не го разгледаме економскиот момент, ова ќе биде еднострана лустрација.“ , истакна Дамовски.Тој тврди дека сите досиеја за кодошите во Македонија се во близината на Скопје и оти во Белград се наоѓаат досиејата за македонски граѓани кои биле кодоши за содржини направени против Југославија.Новинарот Предраг Димитровски пак, смета дека тие 30 милијарди евра не треба да бидат предмет на лустрација, туку на криминал.Учесниците на дебата се сложија дека законот треба да се донесе со консензус.Во четврток е предвидено да има собраниска расправа за предлог измените и дополнувањата на законот за лустрација поднесени од владејачката коалиција.