Македонија
Фуере ги повика властите да организираат лидерска средба
Евроамбасадорот Ерван Фуере по средбата со лидерот на СДСМ, Бранко Црвенковски уште еднаш повтори дека бојкотот не е начин за решавање на проблемите во Собранието и ја повика опозицијата да се врати во законодавниот дом. Тој изрази жалење за неуспехот на владата да ги следи препораките на Европската комисија.„Истовремено морам да кажам дека жалам за неуспехот на владата да ја следи препораката на комисијата од оваа година и од минатата година да обезбеди политички дијалог и токму поради тоа необезбедување на политички дијалог во земјава, се наоѓаме во денешната ситуација“, рече Фуере. Тој ги повика властите да организираат лидерска средба која ќе биде фокусирана на новонастанатата политичка ситуација. „Навистина е жално што бројот на средбите на политичките лидери се сведе на минимум. Имавме се на се една до две средби на лидерите во изминатите две години и освен средбата организирана од страна на претседателот на државата, ние немавме средба меѓу политичките лидери во изминатата година и пол. Затоа ја користиме оваа прилика да ја повикаме владата, властите, дали е тоа премиерот или претседателот да се организира лидерска средба која ќе биде фокусирана на сите тековни прашања, сите отворени прашања во земјава“, рече Фуере.Прашањето за предвремени парламентарни избори, Фуере им го остава на политичките партии. „Прашањето за избори е во рацете на парламентот, им оставам ним да одговорат на тоа, она што сметам дека е трагично во оваа ситуација е дека земјата се соочува со многу сериозни, не само политички туку и економски предизвици, со трагично висока стапка на невработеност, трагично голема стапка на население кое што живее под линијата на сиромаштијата. Ова се прашања што бараат итно владино внимание“ додава Фуере.Фуере е категоричен дека политичка криза има, но вели дека сите партии треба да ја испитаат својата одговорност за ова што се случува. Во врска со слободата на медиумите Фуере вели дека владата треба да создаде услови за непречено функционирање на медиумите.„Вие го слушнавте премиерот кога изјави дека тие не се мешаат во судските одлуки, тоа е едно, но од друга страна владата треба и може да создаде услови за слободно и непречено функционирање на медиумите. И одблиску е набљудувана состојбата и како што знаете едни од главните забелешки на комисијата се однесуваат пред се на нормалното функционирање на судството и слободното функционирање на медиумите“ вели Фуере. /крај/фф/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ВМРО-ДПМНЕ: Лага e тврдењето на Николовски дека хотелите во САД во кои престојувал биле евтини
„Љупчо Дон Николовски, очигледно, кога станува збор за народни пари не памети колку каде дал, секако сеедно му е. Лага e тврдењето на Дон Николовски дека хотелите во САД во кои престојувал биле евтини. Хотелите во САД се платени неколку стотина евра од вечер, потврда за тоа се и документите кои самиот Дон Николовски ги доставил во сметководството на МЗШВ“, велат од ВМРО-ДПМНЕ.
„Дон Николовски ништо не го вади од одговорноста, дека додека земјоделците тука мака мачеле со откуп и пласман, тој ноќевал по скапи хотели платени неколку стотина евра. Дон Николовски раскалашено се однесувал со народните пари. Дон Николовски е лицемерен, никој повеќе не му верува„, се вели во реакцијата на ВМРО-ДПМНЕ.
Македонија
Доцни платата за вработените во Јавното претпријатие „Улици и Патишта“
Вработените во Јавното претпријатие Улици и Патишта не ја добиле платата за август која им се исплатува во септемри, иако рокот за исплата е до 15-ти во месецов. Во отвореното писмо до јавноста, вработените тврдат дека се под константни притисоци и се плашат да штрајкуваат, а како главен виновник за состојбата со платите го посочуваат директорот на претпријатието. Тие тврдат и дека претпријатието има пари, но плати нема.
„Платата за месец септември не е исплатена иако постои информација дека Град Скопје пред десетина дена префрлил повеќе од 40 милиони денари. Новоназначениот ВД директор, Ванчо Умленски, наводно го преземал компјутерот од секторот за Финансии и сите средствата ги пренасочил на добавувачи, меѓу кои и 19 милиони денари на „Пуцко Петрол“, иако на вработените им се потребни 15 милиони денари за исплата на платите„, велат Вработени во ЈП Улици и Патишта.
Од Град Скопје тврдат дека парите за плати треба да ги обезбеди самото претпријатие.
Македонија
Свежо утро, а преку ден сончево и релативно топло
Утрово посвежо, а преку ден, времето ќе биде сончево и релативно топло со мала облачност и со слаб променлив ветер. Минималната температура ќе биде во интервал од 3 до 13, а максималната ќе достигне од 22 до 28 степени, информираат од Управата за хидрометеоролошки работи.
Во Скопје, исто така, утрото посвежо, преку денот сончево и релативно топло време. Според најавите, минималната температура ќе се спушти до 7, а максималната ќе достигне до 27 степени.
Слично време нѐ очекува и утре, додека за во вторник и во среда, најавено е преодно наоблачување со локални врнежи од дожд, наместа поројни, со услови за појава на грмежи.