Од сите аспекти ќе ја разгледаме безбедносната состојба во училиштата, и ќе ги превземеме сите неопходни мерки, независно дали на некого му одговараат тие или не, за учениците кои учат во училиштата да бидат безбедни

Ова го изјави денеска Градоначалникот на Град Скопје, Коце Трајановски, по состанокот со директорите на средните училишта, на кој била разгледувана безбедносната состојба во училиштата, поради последните случувања во кои неколку ученици и еден професор, во повеќе инциденти, беа повредени или прободени со нож. „Клучна точка беше безбедносната состојба, за таа цел во понеделник свикавме и посебна итна седница на Советот на Град Скопје, на која ќе се разгледува безбедносната состојба низ училиштата во Скопје“, најави скопскито градоначалник Коце Трајановски и додаде дека од 21 училиште колку што ги има во Скопје, во сите има поставено видео надзор, а во 14 училишта има физичко обезбедување.„Тоа е направено врз основа на иницијатива и проценка на Советот на родители и на директорите на средните училишта, самите тие проценуваат каква е состојбата и дали има потреба од дополнително физичко обезбедување. Градот Скопје ќе им помогне и на другите училишта доколку оценат дека им треба физичко обезбедување. Ги дискутиравме мерките и постапките кои треба да се превземат за овие состојби да се смират“, рече тој.Со директорите се договарал и начинот и методите за тоа како понатака да се спречат и оневозможат евентуални други вакви инциденти. Позачестени контакти на учениците со педагозите и психолозите, но и инсистирање на поголемо вклучување на родителите во образовниот процес на своите деца, се едни од мерките.Павле Павлов, директор на средното хемиско училиште „Марија Кири Склодовска“, каде се случи еден од инцидентите, рече дека во нивното училиште ваков инцидент немало од почетокот на формирањето на училиштето, односно цели 40 години.„Морам да укажам дека овде немаше тепачка, тоа е неадекватен термин, имаше класичен упад, бидејќи немаше две спротивставени страни туку имаше упад од една толпа на адолесценти кои самите не знаеја по кого да удрат и зошто. Замислете тие почнале прво по девојчињата“, рече тој.Вчера уште еден средношколец беше прободен со нож, овојпат во средното училиште „Коле Неделковски“ во Велес. Ова беше трет инцидент во средните училишта за неколку дена. Претходно маскирана вооружена група нападна четворица ученици и еден професор во средното хемиско училиште „Марија Кири Склодовска“. Завчера пак, со нож беше прободен средношколец од ветеринарното училиште „Браќа Миладиновци“ во скопско Драчево.