Британската влада беше и ќе продолжи да се ангажира со високи грчки политички функционери, за да ја охрабри Атина да биде пофлексибилна во нејзината позиција кон прашањето на името на Македонија, открива WikiLeaks.Како што објавува фамозниот интернет ресурс специјализиран за објавување тајни преписки на американскиот Стејт департмент и американските дипломати од светот, постои доверлива телеграма што американската амбасада ја испратила на 18-ти април 2008 г, од Лондон, што ја објавува денеска „Daily Telegraph“, чие електронско издание објавува десетици тајни дипломатски депеши. Записот на американската амбасада во Лондон се заснова на разговорот што тогашниот функционер на британското Министерство за надворешни работи, Адам Бај кој беше задолжен за Балканот, го водел со поранешната грчка министерка за надворешни работи Дора Бакојани во Атина. Притоа нотирано е „дека има мало придвижување на грчката позиција во однос на дотогашното постојано објаснување дека Скопје одбива да биде флексибилно, а дека Грција работи ангажирано во рамки на процесот во Обединетите нации“.Исто така, во депешата е ставен акцент дека Дора Бакојани на средбата со Бај во тој период забележала дека „е малку веројатно дека што и да е може да се покрене до 1 јуни 2008 г.“, односно кога во Македонија се одржуваа предвремените парламентарните избори. Блај кој е цитиран во тајната американска депеша изјавил дека владата во Лондон е ангажирана  заедно со администрацијата на САД „за излез од грчко-македонскиот ќорсокак“, како и за влез на Македонија во НАТО, за стабилизација на целиот регион и на подолг рок за приклучување кон Европската унија. Во разговорот меѓу американскиот дипломат, неговиот британски колега потврдил дека Лондон ќе продолжи да ги поддржува американските напори за отстранување на грчката блокада кон Македонија и за нејзин влез во НАТО, како и дека Велика Британија ќе лобира меѓу другите земји членки во ЕУ да влијаат врз Атина. „Британската страна го дели расположението на Американците ова прашање да се разреши во следните неколку недели, но поверојатно е дека ќе биде потребно повеќе поттикнување и на двете страни до македонските избори на 1 јуни“, рекол во април 2008 г. Адам Бај кој потврдил дека бил вршен притисок врз власта и опозицијата во Македонија да не го покренуваат прашањето за името во текот на предизборната кампања, за да не се поттикнува национализмот кај гласачите. /крај/дт/сн