Лидерот на ВМРО-ДПМНЕ, Христијан Мискоски, изјави дека опозицијата ќе ја поддржи иницијативата на Алијанса и Алтернатива за интерпелација на министерот за внатрешни работи Оливер Спасовски. При тоа рече дека очекува заедно со албанскиот опозициски блок да има мнозинство пратеници кои ќе му изгласаат недоверба на министерот и тој да си замине од функцијата.

„Ќе им дадеме апсолутна поддршка на партиите од албанскиот опозициски блок, затоа што човекот е најголемиот заштитник на оваа крими коалиција која владее со Македонија во изминатите години. Имаме и свои аргументи зошто ќе ја поддржиме ова интерпелација, затоа се надевам на исцрпна дебата во Парламентот и на поддршка од мнозинството, со што ќе му изгласаме недоверба на најнеуспешниот министер досега. На човекот кој не му избега некој ‘џепчија’, сè што беше одговорно за криминалот во државата му избега и кој знае каде се наоѓа по Европа. И не е само тоа, има многу афери околу него, ќе имате можност да ги чуете деновиве, како што се дуплите матични броеви, за бројот на издадени државјанства и кому сè се издавале тие државјанства“, рече Мицкоски.

Премиерот Зоран Заев, одговарајќи на пратенички прашања во Парламентот зборуваше и за судската одлука во врска со масакрот кај Смилковското езеро.

„Секој заслужува правда, повторување на постапки и одговорност ако се огрешил пред законот. Дел од процесите завршија успешно како Сопот, дел со казни. Овој случај доби повторување“, посочи Заев.

„Сите докази, транскрипти беа презентирани пред судот. Процесот е воден на транспарентен начин. Правосудниот систем е тој кој ги носи одлуките“, додаде премиерот.

„Политичарите мора да ги тргнат рацете од судството и од обвинителството. Зошто таа година кога бевме заедно не направивме нешто?! Затоа што тоа не е наша работа. Имаме должност да охрабруваме доверба во правосудниот систем“, се обрати премиерот Заев кон пратеникот од Алијанса за Албанците кој го постави пратеничкото прашање.

Лидерот на ВМРО-ДПМНЕ, Христијан Мицкоски, денеска одржа средба со докторите кои се во првите редови во борбата против Ковид-19, а посочи дека трибината била свикана поради неубав јубилеј, односно година дена од првиот дијагностициран случај на Ковид-19 во земјава.

„Тогаш во тоа време нè убедуваа дека опозицијата ширела лажни вести, дека опозицијата била таа којашто не знаела што зборува, дека власта ги имала конците во свои раце и дека практично имале стратегија, имале план, имале визија како да спречат понатамошно ширење на вирусот. Нè убедуваа дека ќе имаме не повеќе од 2.000 луѓе кои што ќе заболат од овој вирус, за жал денеска имаме повеќе од 100.000 евидентирани, можете да замислите колкава е бројката на тие коишто не се евидентирани“, посочи Мицкоски.

Тој додаде и дека повеќе од 3.000 граѓани ги загубиле животите поради, како што кажа, неспособноста на Зоран Заев и владата на СДСМ.

„За жал, и по една година ниту имаат план, ниту имаат визија, ниту, пак, имаат стратегија, туку напротив служиме за потсмев. Луѓето буквално играат мајтап со Македонија, единствената држава во Европа којашто сè уште нема набавено сопствени вакцини. Денеска еден од присутните, претседателот на комисијата, прочита фејсбук-статус од негов колега којшто буквално моли да добие вакцина од министерот, човекот има 65 години. Така што се наоѓаме во една апокалиптична ситуација за здравјето на граѓаните, за здравјето на нацијата и јас навистина единствено нешто што можам во овој момент да побарам е голема општествена поддршка да се совладаат овие неспособни луѓе коишто денеска се наоѓаат во Владата, а потоа да дојдат луѓе коишто знаат како навистина да ги решат напластените проблеми“, посочи лидерот на опозициската партија.

На 26 февруари 2020 година во земјава беше потврден првиот случај на коронавирус, кај жена која одредено време престојувала во Италија. Таа подоцна успешно заздрави од Ковид-19.