ВМРО-ДПМНЕ денеска објави дека поседуваат документи од кои како што тврдат може да се види дека фирмите Пристоп и Пристоп МК соработувале со Бранко Црвенковски

ВМРО-ДПМНЕ денеска објави дека поседуваат документи од кои како што тврдат може да се види дека фирмите Пристоп и Пристоп МК соработувале со Бранко Црвенковски, не само кога тој бил претседател и премиер, туку и кога бил лидер на СДСМ. Од СДСМ ова го оценија како лага и најавија кривични пријави за клевета за Бичиклиски, Стефановски и Андоновска.„До нас пристигнаа нови документи поврзани со соработката помеѓу Пристоп и Пристоп МК со СДСМ и Бранко Црвенковски. Според нив,во 2004 година Бранко Црвенковски ги користи услугите на Пристоп за осмислување на неговата претседателска кампања. Слоганот „ДРЖАВНИК“ со кој тој настапи на претседателските избори е обмислен, напишан и предложен од Пристоп. Овие документи покажуваат дека Пристоп за потребите на кампањата за претседател на Црвенковски прави тестирање на слоган, испитување на јавно мислење, дава совети, говори“, изјави Сашо Стефановски од ВМРО-ДПМНЕ.Тој истакна дека еден од советите кои Пристоп му ги дава на Црвенковски е да се направи договор со Невладини организации за да покренат таканаречена ГО ТВ кампања.„Во истиот документ стои замислете: да се пронајде техника за целиот процес на договарање и финансирање на ГО ТВ кампањата која треба да ја водат невладините организации, со цел овој процес да биде брз и ефикасен. Тоа значи дека Црвенковски се советува финансиски да ги подржи невладините организации за да ги исполнат зацртаните партиски цели, рече Стефановски.Документите според него покажуваат и дека Пристоп го советува Црвенковски, членовите на СДСМ да праќаат писма до медиуми за што било обмислено упатство до членовите.„Ништо не е случајно, се работи за вешто смислен план на соработка меѓу Бранко Црвенковски, Дејан Верчич и Пристоп. Тоа значи дека истата фирма Пристоп Бранко Црвенковски ја користи и кога е претседател на Владата, и кога е претседател на државата и кога е Претседател на СДСМ“, посочи Стефановски. Тој побара Црвенковски да одговори колку чинела оваа најнова стратегија на Пристоп, направена, како што рече, за партиските потреби на Црвенковски и дали и оваа стратегија е платена со државни пари.Од СДСМ велат дека ВМРО-ДПМНЕ лажат.„Лажевте за законитоста околу организацијата на Самитот во Охрид, лажевте за сумите  со кои играте дека се потрошени на тој Самит, а денеска продолжувате да лажете за слоганот „ДРЖАВНИК“ и најразличните кампањи кои ги споменувате, а наводно биле изработувани од агенцијата Пристоп“, се наведува во писмената реакција на СДСМ./крај/бд