Македонија
ВМРО-ДПМНЕ: Има документи со кои се сведочи дека СДСМ врбува гласачи
ВМРО-ДПМНЕ денеска информираа дека до нив биле доставени документи од членови на СДСМ со кои сведочеле за тоа дека социјалдемократите врбуваат граѓани кои мора да гласаат за нив.
ВМРО-ДПМНЕ денеска информираа дека до нив биле доставени документи од членови на СДСМ со кои сведочеле за тоа дека социјалдемократите врбуваат граѓани кои мора да гласаат за нив.
„Поседуваме документација од повеќе општински организации на СДСМ што докажува дека СДСМ оваа акција ја спроведува на републичко ниво. ВМРО-ДПМНЕ целосната документација ќе ја достави до Државната изборна комисија, МОСТ, мисијата на ОБСЕ и до странски дипломатски претставништва во државата“, рече Спиро Ристовски од ВМРО-ДПМНЕ.
Тој покажа документ со потпис од генералниот секретар на СДСМ, Андреј Петров и со официјален печат од СДСМ. Документот како што рече Ристовски е задолжение за секој член на СДСМ да обезбеди по 20 лица кои на претстојните избори со сигурност ќе гласаат за СДСМ.
Со друг документ како што посочи Ристовски се покажува дека лица-капитени се задолжени за реализација на проектот, како и упатство за врбување на граѓани. Тврди дека постои и прецизен список.
„Во документацијата ја има и изјавата на актуелниот потпретседател на СДСМ Зоран Заев кој на партиска трибина говори за проект на СДСМ со кој се задолжуваат членовите да обезбедат сигурни гласачи“, образложи Ристовски.
Документацијата ВМРО-ДПМНЕ ќе ја достават и до Јавното обвинителство кое ќе има за задача да ја утврди веродостојноста и да го расветли сомнежот дали СДСМ врши манипулација и поведување на граѓаните да гласаат за нив. Очекуваат од Јавното обвинителство да покрене случај кој потоа ќе се процесира низ судските инстанци./крај/бд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Муцунски на одвоени средби со министрите за надворешни на Литванија и Мароко: во фокусот поддршката на патот кон ЕУ и економската соработка
За време на одржувањето на 79-тото Генералното собрание на Обединетите Нации, министерот за надворешни работи Тимчо Муцунски, на маргините од ГС, имаше одвоени средби со министерот за надворешни работи на Република Литванија, Габриелиус Ландсбергис со министерот за надворешни работи, африканска соработка и иселеништво на Кралството Мароко, Насер Бурита.
На средбата со литванскиот колега беше искажано заемно задоволство од развојот на билатерални односи, кои двете пријателски земји во континуитет ги негуваат во изминатиот три-децениски период. Од двете страни беше нагласена подготвеност за натамошно унапредување на меѓусебното пријателство и партнерските односи, преку продолжување на интензивниот политички дијалог на сите нивоа.
Министерот Муцунски се заблагодари на континуираната и искрена поддршка на Литванија за евроинтегративните напори на Македонија, нагласувајќи дека земјава е целосно подготвена за започнување преговори за членство во ЕУ, при што тој ја поздрави одлуката за отворање на канцеларија на Литванија во Скопје, која е уште една силна потврда за блиските и пријателски билатерални односи и за заложбите за нивно натамошно унапредување.
Министерот Ландсбергис изрази уверување дека Литванија и во наредниот период ќе продолжи да биде силен поддржувач на нашите евроинтеграции.
На средбата со министерот за надворешни работи, африканска соработка и иселеништво на Кралството Мароко, Насер Бурита, беше нагласен позитивниот развој на односите меѓу двете пријателски држави, како на билатерален, така и на мултилатерален план. Во тој контекст беа разменети и мислења за актуелните меѓународни прашања, како и за регионалните теми, вклучително и надворешно-политички приоритети и состојби во непосредното опкружување на двете земји.
Фокусот на двете средби беше ставен и на понатамошното продлабочување на билатерелната соработка, со посебен акцент на зајакнување на економските релации помеѓу двете земји.
Македонија
Организациска директорка на Токсикологија обвинета за злоупотреба на службена положба
Јавен обвинител од Основното јавно обвинителство Скопје поднесе Обвинителен предлог против едно лице за кривично дело – Злоупотреба на службена положба и овластување од член 353 став 1 од Кривичниот законик.
Обвинетата, во својство на организациски директор на Јавна здравствена установа – Универзитетска клиника за токсикологија, ги пречекорила своите службени овластувања со намера да овозможи противправна имотна корист за 17 лица. Постапувајќи спротивно на Законот за спречување корупција и судир на интереси, Изборниот законик и Законот за здравствена заштита во мај годинава склучувала договори за дело со лицата за нивно работно ангажирање на Клиниката, по што ретроактивно издавала платни налози со кои им исплаќала месечен надомест за нивен претходен наводен работен ангажман. На списокот додавала и лица со кои воопшто не бил склучен договор за дело и на кои исто така им се исплаќал надомест за наводно извршени работи. На овој начин буџетот на Клиниката бил оштетен за сума од 659.781 денар, а истовремено на ангажираните лица им била овозможена противправна имотна корист, извести Обвинителството.
Македонија
СДСМ: Нема да се реализираат 100 милиони евра за општините оваа година, уште една лага на ВМРО-ДПМНЕ
Уште едно разочарување и неисполнето ветување од Владата е на прагот. Имено, најавените 100 милиони евра за развој и поддршка на општините, ветени од оваа Влада, повеќе од јасно е дека нема да се реализираат оваа година. Ова е уште еден доказ дека ВМРО-ДПМНЕ не успева да ги оствари своите ветувања и повторно ја изневерува довербата на граѓаните, белат од СДСМ.
„Министерот Перински најави дека средствата нема да бидат доделени директно на посебните сметки на општините, како што тоа го правеше СДСМ. Наместо тоа, парите ќе се исплаќаат директно од буџетот до изведувачите, што значи дека оваа година реализацијата на средствата е речиси небвозможна или ќе биде минимална. Ваквиот пристап не само што го забавува процесот, туку и отвора можност за манипулации, централизирајќи ја контролата во рацете на Владата.
За разлика од ова, СДСМ реализираше проекти вредни 265 милиони евра во општините на далеку поефективен начин. Средствата беа наменски на сметките на општините, каде што локалните власти имаа директен пристап и можност сами да ги управуваат своите проекти. Ова беше модел кој осигуруваше ефикасна реализација и транспарентност, нешто што е сега оневозможено од страна на ВМРО-ДПМНЕ“, се истакнува во нивната реакција.
Според СДСМ, централизацијата на средствата и контролата од страна на Владата е директен удар врз децентрализацијата и автономијата на општините. Ова, како што велат, покажува дека ВМРО-ДПМНЕ не е подготвена да им верува на општините и на локалните власти, што води до стагнација и нереализирани проекти кои се од суштинско значење за граѓаните.