Заменик-претседателката на СДСМ, Радмила Шекеринска, денес во Крушево оцени дека покажавме оти нашето јавно здравство може да го положи тестот соочени со кризата предизвикана од коронавирусот.

„Ја вративме и довербата на граѓаните кон јавното здравство, кон здравствените работници, кон докорите и медицинските лица. Сега го стекнавме искуството и вложивме уште повеќе во јавното здравство. Здравствениот систем го подготвивме за секој следен бран на коронавирусот, а со стабилни институции по изборите, со функционален парламент, со нормална влада, во која нема да постојат министри што ги блокираат одлуките или нè уценуваат со потписи, ќе можеме целосно да ги заштитиме државата, економијата и граѓаните од последците на коронавирусот“, рече Шекеринска.

Таа истакна дека додека лекарите и медицинскиот персонал се бореле за секој живот, лидерот на ВМРО-ДПМНЕ, Христијан Мицкоски, со својот пример во сали за вежбање и во кафеани поттикнувал да не се почитуваат мерките и да се потцени опасноста. Исто така, како што додаде Шекеринска, додека тие во кампањата строго се придржуваат до сите мерки за заштита, Мицкоски уште на почетокот најавил дека нема да ги почитува.

Пред нас се многу сериозни избори, на кои избираме сигурна иднина во интерес на заштитата на јавното здравје, брза развојна економија и европски перспективи, истакна Оливер Спасовски.

„Видовте дека претставничката од ВМРО-ДПМНЕ во Владата блокира 30 милиони евра, пари од Светската банка, што требаше да бидат вложени директно во здравството, во време кога целиот свет наоѓа начини да се справи со последиците од корона-кризата. А ги слушаме деновиве како ќе го обновеле здравството, што го урнисаа во децениското владеење со криминалните политики, и продолжуваат да се однесуваат неодговорно. Ние за три години обновивме 30 јавноздравствени установи во земјата“, рече Спасовски.

Тој нагласи дека Куманово добило нов Ургентен центар со можност за опслужување 200.000 пациенти од Североисточниот Регион на државата, инвестиција од 900.000 евра, работи новиот Ургентен центар и во Прилеп, иницијатива што постоеше цели 15 години, вели Спасовски. Додаде дека Струмица, по 33 години, добила нова општа болница, а по 50 години, целосно се реновирал Институтот за трансфузиона медицина.

„Ги покачивме платите на лекарите и медицинскиот персонал. И ќе продолжиме со вработувања лекари и медицински сестри во јавното здравство, кое веќе го зајакнавме со 780 лекари и 1.000 медицински сестри. Со нашиот развоен концепт обезбедуваме трипати повеќе специјализации. Скопје добива нов клинички центар. Охрид, Тетово и Струмица добиваат модерни регионални здравствени центри. Воведуваме и целосно електронско здавство, без користење хартиени форми на документи. Замислете како ќе беше во оваа здравствена криза да не ги имавме направено вложувањата во здравството за само три години?! Како ќе беше да не ги имавме помошта и поддршката од нашите НАТО и ЕУ-партнери, што ги обновивме во изминатите 3 години?! Обнова на режимот е опасност што нема да ја дозволиме. Мораме да излеземе на гласањето на 15 јули во што поголем број за да продолжиме по правиот пат“, додаде тој.

При денешната посета на Струмичкиот Регион, претседателот на СДСМ, Зоран Заев, беше на средба со жителите на населеното место Иловица.

Заев со граѓаните зборуваше за спроведените мерки и политики, решенијата од новата програма, а главен фокус беше ставен на темата за рудникот за бакар и злато „Иловица – Штука“.

Пред присутните претседателот Заев нагласи дека тој и СДСМ го одржаа зборот и затоа денеска во Иловица нема рудник, кој би ги загрозил природата и животната средина.

„Кога во 2016 на парламентарните избори и во 2017 на локалните ја баравме вашата поддршка, дадовме збор дека рудници овде нема да има. Денеска, стојам пред вас и со гордост можам да ве гледам затоа што зборот го одржавме. Струмичката Котлина и нашиот Огражден ги спасивме од рудникот на смртта. Тешка беше таа борба, ја водевме со години, но верувавме дека ќе успееме и успеавме. Денес, вие граѓаните од Иловица, но и целиот овој крај, можете да се гордеете што не дозволивте да се отвори рудник и што заеднички успеавме да ги зачуваме животната средина и оваа наша плодна земја, оваа наша прекрасна природа“, порача Заев.

Тој се осврна и на ветувањата на ВМРО-ДПМНЕ за отворање рудници и нејзиниот пристап кон интересите на граѓаните.

„ВМРО-ДПМНЕ донесе сериозен проблем со концесиите за рудници. Тој проблем посветено го решававме со вас граѓаните и за цело ова време ВМРО-ДПМНЕ не само што не се извини, не само што не призна дека погрешила пред граѓаните, туку го гледаме нејзиниот носител Игор Јанушев дека пак ветува рудници, пак нови маки за граѓаните. Тоа само покажува дека во ВМРО-ДПМНЕ само профит ги интересира, не им се важни интересите и здравјето на граѓаните, заштита на природата, не, само профит и пусти пари им се важни. Е, затоа ќе си останат во опозиција уште 4 години. Бидете спокојни, во Иловица рудник нема да има“, заклучи претседателот на СДСМ.