Притворени се триесет и двегодишна жена и дваесет и тригодишно момче од Скопје под сомнение дека во текот на месецов извршиле четири кражби од кои три во скопската населба Гази Баба, а пленот изнесувал над 6.000 евра, соопшти денеска МВР.

Како што информираат од МВР, првата тешка кражба  жената ја извршила сама на 4.јуни во куќа на нејзин роднина во скопската населба Гази Баба, при што одзела девизи и денари во вредност од околу 450 евра. По кражбата се упатила кон населбата Маџари, каде со второпријавеното момче, парите ги потрошиле, а паричникот со документите го запалила.

Втората тешка кражба пријавените ја извршиле заедно, ноќта на 10-ти спрема 11 јуни, повторно во куќа во населбата Гази Баба, но лоцирана на друга улица. Од овде одзеле пари и четири мобилни телефони, во вредност од 100.000 денари, еден лаптоп и две женски ташни.

На 9. јуни во селото Трубарево, двоецот по исто сценарио како и во претходната кражба одзеле девизи, мобилни телефони, паричник сè во вредност од околу 210.000 денари.

Последната кражба ја извршиле на 12. јуни во куќа лоцирана повторно во скопската населба Гази Баба, на улицата “Франц Лист“, при што одзеле два лаптопа и една женска ташна во која имало два мобилни телефони, стекнувајќи се со противправна имотна корист од околу 62.000 денари.

Од страна на Истражен судија на пријавените им е одредена мерка притвор во времетраење од по 15 дена./крај/со/ми