Претседателот на СДСМ, Венко Филипче, денеска во одговори на новинарски прашања предупреди дека актуелната влада свесно ја носи државата во изолација, со директни последици врз економијата, транспортниот сектор и секојдневниот живот на граѓаните.

„Со националистичка реторика, со лажна пропаганда дека сите се предавници на националните интереси, ветуваа подобра преговарачка позиција со Европската Унија. Што направија? Ја изолираа земјата. Гледајте каде сме ние, гледајте какви проблеми има, гледајте какви протести има. Ќе страда индустријата во следниот период, нема повеќе да функционира како што функционираше досега транспортниот сектор. Камионџиите ги блокираат граничните премини, не без причина. Тие имаат реален проблем. Но владата знаела од 2025 година и не презела ништо. Една од работите што најмногу загрижува е антиевропската реторика на оваа влада и лоцирањето на вината во сѐ во Европа, додека тие домашната работа не ја сработуваат“ рече Филипче.

Тој нагласи дека Европската Унија известила за овие одлуки за новите регулативи, но дека Владата на Мицкоски не презела ништо со месеци.

„Знаевме дека во 2025-та година таква одлука донесе Европската Унија, се поставува прашањето што Владата направи на тоа поле?“ рече претседателот Филипче.

Тој додаде дека ваквото неодговорно однесување води кон сè подлабока меѓународна изолација:

„Ние ќе бидеме сè повеќе и повеќе изолирани со оваа влада на маргините на Европската Унија. Гледајте како Соединетите Американски Држави исто така не ставаат по страна. Оваа влада нема покана за бордот за мир на претседателот Трамп и новата администрација, има други земји во регионот.“

Филипче додаде дека станува збор за намерна стратегија на изолација.

„Тоа е само доказ дека владата намерно ја води земјава во изолација, носејќи сомнителен капитал, соработувајќи со авторитарни режими во регионот, гушејќи ја демократијата и слободата на говор и тоа едноставно не води никаде. Една од работите што најмногу загрижува е антиевропската реторика на оваа влада и лоцирањето на вината во сѐ во Европа, додека тие домашната работа не ја сработуваат. Очигледно е дека владата не прави ништо, а не правејќи ништо ние ќе бидеме сѐ поизолирани. Граѓаните ќе имаат сѐ поголем проблем. И не се само превозниците. Многу други граѓани имаат проблем на повеќе нивоа. Со оваа влада, со изолацијата која што намерно се наметнува, сè страда во државата. Сè буквално“ рече претседателот на СДСМ, Венко Филипче.

Првиот заменик-председател и министер за европски прашања на Северна Македонија, Беким Сали, денеска оствари средба со амбасадорот на Кралството Шпанија, Рафаел Соријано Ортиз.

За време на средбата се дискутираа блиските билатерални односи меѓу Северна Македонија и Шпанија, како и можностите за проширување на соработката во различни области, вклучувајќи ја европската политика, економијата, образованието и културата.

Посебен фокус беше ставен на евроинтеграцискиот процес на Северна Македонија, со акцент на важноста од напредокот во реформите и исполнувањето на европските критериуми.

Исто така, на средбата се разгледа и реформската агенда која е во тек, со цел зајакнување на институциите, транспарентноста и подобрување на инвестициската клима, поставувајќи ја земјата поблиску до стандардите на Европската Унија. Двете страни изразија подготвеност за продлабочување на соработката и зајакнување на стратешките односи меѓу двете земји.

Јавното обвинителство отвори предмет по извештајот на Државниот завод за ревизија за Општина Охрид, во кој утврди дека се граделе хотели и куќи без дозволи, дека општината нема донесено урбанистички планови за 20 населени места, а утврди и неправилности и во финансиското работење на општината.

„Државниот завод за ревизија на 19.12.2025 година го достави ревизорскиот извештај за Општина Охрид до Јавното обвинителство на Република Северна Македонија, од каде извештајот е доставен на надлежно постапување на Основното јавно обвинителство Охрид. Оформен е предмет и се преземаат дејствија на проверки“, соопштија од ЈОРМ.

Ревизијата утврди дека општината нема донесено урбанистички планови за 20 населени места, а во дел од населените места се изведени градби и градежни активности за индивидуално домување и хотелски комплекс без платен надоместок за уредување на градежно земјиште и без издадени одобренија за градење.