Во режија на ВМРО-ДПМНЕ, во градот на театарот, Прилеп, синоќа се одигра срамна партиска претстава каква не паметат ниту најдоследните хроничари на политичките збиднувања во градот.

Трагикомедија без преседан – Христијан Мицкоски, премиерот чија Влада за само една година ги задолжи граѓаните на Mакедонија за фрапантни 7 милијарди евра, синоќа зборуваше за економски раст, истакна на прес-конференција Петра Лукароска од СДСМ.

Истиот тој Мицкоски, вели таа, бесрамно лажеше за виртуелниот раст на платите на работниците, додека во исто време генералниот Директорат на Европската Комисија, Евростат, укажува на драматичен пад на животниот стандард и на висината на работничките плати. Не во некоја друга земја, туку овде кај нас, во Македонија.

Мицкоски, како што додаде, не собра храброст да проговори за корупцијата во владините институции како главна причина за кочанската трагедија, за енормното финансиско задолжување на неродените генерации Македонци, за “дивеењето“ во дивото градење и мафијашките пресметки во главниот град.

Демократска обнова на Македонија (ДОМ) изразува целосна поддршка на граѓанската иницијатива за заштита на планината Кожуф од изградба на мали хидроелектрани и се солидаризира со активистите и здруженијата кои денес го формираат живиот штит и организираат блокади за да ја спасат планината од еколошка деградација.

„И покрај претходните ветувања од институциите и политичките партии и покрај јавниот отпор уште во 2023 година, денес гледаме повторно активирање на концесии и дозволи за проекти што се во директен судир со интересите на локалната заедница и јавниот интерес“, велат од ДОМ.

Од партијата додаваат дека планината Кожуф претставува едно од ретките природни богатства со сочуван биодиверзитет, извори на чиста вода и воздух и огромен потенцијал за еколошки туризам и одржлив развој.

„Наместо да се уништува за краткорочни економски интереси, таа заслужува внимателна и долгорочна заштита. Затоа, ДОМ го поддржува повикот за итно повлекување на спорните дозволи за градба, прекин на сите активности за изградба на мали хидроелектрани на Дошница, како и за започнување институционална постапка за прогласување на Кожуф за Национален парк“, велат од партијата.

Од таму додаваат дека како партија со јасна зелена агенда, ДОМ отсекогаш стоела на страната на природата, локалните заедници и еколошките вредности. „А денес, стоиме заедно со граѓаните кои одлучија да не молчат. Затоа што борбата за Кожуф е симбол на тоа дали имаме држава која ги штити своите природни богатства или ја продава иднината за нечии приватни интереси“, велат од ДОМ.

Министерот за европски прашања, Орхан Муртезани, денеска имаше воведно обраќање на настанот насловен „Геополитичката слика и проширувањето на Европската Унија: Перспективите на Северна Македонија и другите земји кандидатки од Западен Балкан“, кој се одржа во Македонската академија на науките и уметностите.

Во своето обраќање, Муртезани истакна дека политиката на проширување на ЕУ треба да се сфати како геополитичко прашање кое бара конкретни и решителни чекори, особено во контекст на тековните промени во глобалната рамнотежа и растечката геополитичка конкуренција.

Министерот нагласи дека Северна Македонија останува силно посветена на реформите и европските стандарди и покрај долготрајниот пристапен процес.

Тој рече дека успешното интегрирање на земјите од Западен Балкан е од суштинско значење не само за регионалниот мир, туку и за јакнењето на глобалната кредибилност и единство на Европската Унија.

„Во време на длабоки геополитички промени, дијалозите како денешниот добиваат особено значење. Собрани овде на оваа значајна тркалезна маса, со цел да ја разгледаме геополитичката слика и нејзината поврзаност со процесот на европско проширување, неопходно е да потенцираме дека проширувањето не е само бирократски процес, ниту пак само симболичен чин, тоа е пред сè геополитичко прашање. Денес, Европа се соочува со одлуки кои ги надминуваат традиционалните рамки, барајќи стратешка јасност и обновена решителност“.

Додаде дека во овој поширок контекст, Западен Балкан, а посебно Северна Македонија, претставуваат клучни точки на стабилност и стратешка основа за Европа.

„Европската Унија одамна го промовира проширувањето како стратешка инвестиција во мирот, безбедноста, стабилноста и просперитетот. Но, реториката мора постојано да се претвора во конкретна акција, особено во услови на засилена геополитичка конкуренција. Патот по кој се движи Северна Македонија ја отсликува и надежта и предизвиците на процесот на
проширување. Нашата земја доследно спроведува сеопфатни реформи во управувањето, владеењето на правото и економската отпорност, усогласувајќи се притоа со највисоките стандарди и очекувања на Унијата. Нашата посветеност останува непоколеблива и покрај повремената внатрешна исцрпеност предизвикана од долгогодишната неизвесност“.

Од друга страна, рече Муртезани, неодлучноста или одложувањето ги откриваат ранливостите, со тоа охрабрувајќи алтернативни геополитички наративи и чинители кои имаат за цел да ги поткопаат европското единство и кохезија.