Идниот понеделник, на 11.јули, првообвинетиот од случајот „Пајажина“ сопственикот на А1 телевизија Велија Рамковски ќе даде исказ во врска со обвинението според кое се товари за злосторничко здружување, затајување

Идниот понеделник, на 11.јули, првообвинетиот од случајот „Пајажина“ сопственикот на А1 телевизија Велија Рамковски ќе даде исказ во врска со обвинението според кое се товари за злосторничко здружување, затајување данок, перење пари и злоупотреба на службената положба. Додека судијката Павлина Христовска се договараше со бранителите на 23-та обвинети во случајот „Пајажина“ за тоа по колку мина сведоци ќе се испрашуваат на ден, Велија Рамковски рече „јас имам 15 минути, толку сум напишал’.

Идниот понеделник, освен Рамковски исказ ќе треба да дадат и Амди Рамковски, братот на сопственикот на А1 телевизија, Невин Рауф и Зоран Мицевски.

Идната седмица се очекува исказ да дадат сите обвинети во  случајот „Пајажина“. Ќе се испрашуваат по четворица сведоци секој ден, па со оглед на тоа што од 23-ца обвинети 17 се присутни, петмина се во бегство, а случајот на една од обвинетите е издвоен, се очекува распитот на обвинетите да заврши до крајот на следната седмица.

Судијката одлучи додека еден од обвинетите дава исказ, во судницата да не бидат присутни другите обвинети.

По четири одложувања денеска обвинителката Гордана Гешковска неколку часови го читаше обвинителниот акт составен на повеќе од 70 страници за 23-та обвинети во случајот „Пајажина“

Обвинителството го товари Рамковски, за основање на 24 фирми во Македонија и странство кои биле раководени од членовите на злосторничкото здружување и биле ставени во функција во зависност од потребите на членовите.

Исто лице се појавувало како основач на повеќе фирми, управителите постојано се менувале. Според Обвинителството, доказ дека сите овие фирми биле меѓусебно поврзани говорел фактот што тројца од обвинетите биле овластени потписници за сите фирми.

Според материјалните докази и превземените истражни мерки, една од фирмите во која имало тројца вработени на име изработка сценарија и режија за проекти и тоа документарни филмови, забавни, дебатни и контактни емисии до телевизијата доставиле фактури во износ од 3 милиони евра, кои биле книжени и за овој износ медиумот невистинито ги зголемил расходите и го одбегнал плаќањето на соодветни даноци.

Според обвинението, исто така се исплаќале големи износи на име плати за вработените, главно во телевизијата, а притоа биле пријавувани на минимални износи на кои бил плаќан данок и придонеси, а во готово на новинарите и другите вработени им биле исплаќани многу поголеми износи, без да се плати данок за овие давачки.

Речиси сите обвинети се товарат за перење пари, злоупотреба на службена положба, даночно затајување , оштетување на доверители и злосторничко здружување.

„Немаме ништо кажано и немаме што да кажеме за обвинението. Ако сега било кој прашате од судската сала за што се работи, за што се обвинети луѓево јас ен верувам дека некој од нив ќе ви каже точно и конкретно за што. Тука се натрупани сите кривични дела кои што спаѓаат во групата економски криминал, така да по избор ставено е се што може да се стави, мислам дека имаше и уште нешто ставено, но тоа е работа на јавниот обвинител, но допрва ќе доаѓа разврската“ рече адвокатот Мирослав Вујиќ.

Вкупната сума за која се товара обвинетите не е наведена во обвинителниот акт.

„Не можете да слушнете бидејќи таква финална бројка ниту може да има, ниту треба да има, затоа што се работи за повеќе фирми, за повеќе обвинети, за дејствија. Апсурд е да се чуе една цифра. Да се знаеја досега една цифра 90 отсто од работите ќе беа решени“ додава Вујиќ./крај/фф