Тешко е да се зборува за професионални стандарди во новинарството во услови на проблеми во нивната егзистенција и во услови кога дел од медиумите не се самоодржливи, сметаат учесниците на дебатата „новинарството е мртво – да живее пропагандата“ организирана од НВО Инфоцентарот

За дел од учесниците, последните случувања во македонското новинарство поврзани со „Утрински Весник“ и медиумите од „Перо Наков“ влечат корени во изминатите 20 години. За Љупчо Зиков од „Капитал“ основата на проблемот е како се финансираат медиумите, дали тие се самоодржливи на пазарот. Генерално, препознава ефтин новинарски производ и малку професионалци во фелата. „Овде станува збор за реална бизнис логика. Има логика – нема логика. Има бизнис – нема бизнис. Значи загубата се прави на начин на кој се прави – пазарно. Не им се купува весникот. Клучот на проблемот е тоа – не им го купуваат весникот. Што е ова, ние во некој кибуц живееме, па произведуваме од љубов? Тоа може само Македонска радио-телевизија – основач е Собрание на Република Македонија, парите ги дава министерот за финансии, платите ги дели владата. Значи тие можат. Може и некој од филантропски и алтруистички причини да го прави тоа“, рече Зиков. За подобрување на состојбите, според првиот човек на Самостојниот синдикат на новинарите и медиумските работници, Тамара Чаусидис, потребен е отпор од страна на новинарите и барање на причините за сегашната ситуација.“Новинарството не е мртво. Тоа бара простор да се изрази и на Твитер, и на Фејсбук и на другите социјални мрежи. Тоа чека. И јавноста и ние како професионалци бараме простор и време кога ќе можеме да бидеме навистина професионални. Но, за тоа навистина ни треба отпор и треба да ги бараме причините зошто е тоа така, да ја видиме својата вина. Вината ја гледам во парите, во начинот како се работи со медиумите и на начинот на кој ние сме подготвени да молчиме и да го штитиме сопствениот работодавач, а да го напаѓаме конкурентот. Ние сме дел од проблемот и дел од приказната и мислам дека оттука треба да почнеме“, рече Чаусидис. Според комуникологот Климе Бабунски, таквиот отпор не смее да стане причина за создавање нова пропаганда.„Далеку од тоа дека не треба да се дава отпор. Но, ако тоа биде отпор кој повторно ќе се сведе на пропаганда е најлошото што може да се случи на кој и да е медиум или на кој и да е новинар“, рече Бабунски. Денешната дебата беше организирана во рамки на презентацијата на извештајот „Парламентарни избори 2011“, направен во рамки на програмата „Медиумско огледало“ на НВО Инфоцентарот.