Ни во најлош сон не сум можела да сонувам дека ќе ми се случи сето ова. Тоа што го преживеав без моја вина тешко се одрази на моето здравје, животот на моето семејство и мојата кариера.

Ни во најлош сон не сум можела да сонувам дека ќе ми се случи сето ова. Тоа што го преживеав без моја вина тешко се одрази на моето здравје, животот на моето семејство и мојата кариера. Работата ја прифатив со најискрена намера да ја креирам програмата на А1 телевизија. Петнаесетгодишната кариера на новинар и креативец се дупна како балон од сапуница. Се прашувам зошто, за мене директорското место во најгледаната телевизија беше предизвик, а после се ме отсликавте како криминалец.

Вака низ солзи се бранеше поранешната директорка на А1 телевизија, Анета Кочишки, обвинета во случајот „Пајажина“, која пред судскиот совет тврдеше дека не е виновна и дека немала врска со финансиите во А1 телевизија, каде била директор десет месеци.

Таа детално го објасни нејзиното стапување на функција и нејзините ингеренции во телевизијата, нејзина работа била единствено да се грижи за програмската шема на А1 телевизија, да ја претставува телевизијата пред клиенти и  да комуницира со амбасадите.

Кога дошла на местото директор на телевизијата, во 2010 година, организацијата во неа веќе била јасно воспоставена, со јасно определени оддели, кои што за својата работа според нејзини претпоставки му одговарале на сопственикот, Велија Рамковски.

Го прифатила работното место, за кое преговарала со Хеди Рамковски и поранешниот директор на А1, Дарко Перушевски, затоа што и било кажано дека нејзина обврска ќе биде уредувањето на програмската шема.

Одлуките за програмата не ги донесувала сама, тоа го правела заедно со програмскиот оддел, кој што го сочинувале Нехру Хоџа, Анета Ветерова и Хеди Рамковски. Конечната одлука за тоа кои програми ќе бидат купени ја носел Велија Рамковски.

Договорите за маркетинг ги склучувал Зоран Силјаноски, кој бил задолжен за одделот за маркетинг, а поголемите договори ги склучувале заедно, но цената, попустите, фактурите, контролирањето на минутажата на рекламите ја вршел Силјаноски.

Одделот за сметководство ја изготвувал целосната документација, вклучувајќи ги и даночните пријави кои ги потпишала, а овластени потписници на банкарската сметка на А1 биле Невин Рауф, Амди Рамковски и Жаклина Ѓорѓиевска.

„Никогаш не би презела обврска за финансиите бидејќи немам образование за тоа и не се разбирам“ рече Кочишки, која додаде дека таа не ги определувала ниту платите на вработените.

Кочишки, како директор на А1 телевизија ги потпишувала месечните даночни пријави и една годишна даночна пријава и тоа за 2009 година кога не била управител, бидејќи дотогашниот директор, Перушевекси заминал итно на боледување, а потоа се вработил и во друга фирма.

Од Велија никогаш не добивала никакви налози и не контактирала со него за финансии.Судењето за случајот „Пајажина“ продолжува во понеделник./крај/фф