Против инвеститорот и изведувачот на комплексот „Космос“ се поднесени кривични пријави, а деновиве ќе биде поднесена кривична пријава и против надзорот

Против инвеститорот и изведувачот на комплексот „Космос“ се поднесени кривични пријави, а деновиве ќе биде поднесена кривична пријава и против надзорот, соопшти градоначалникот на општината  Гази Баба, Тони Трајковски. Како инвеститор и изведувач на објектот „Космос“ се јавува фирмата на пратеникот и лидер на ПЕИ, Фијат Цаноски.

„Бидејќи градбата се изведувала спротивно на Законот за градење, спротивно на основниот проект против сите учесници во градбата, инвеститорот, изведувачот, надзорот  ќе се преземат соодветни постапки. Против инвеститорот и изведувачот на објектот „Космос“ поднесени се кривични пријави, а деновиве ќе биде поднесена кривична пријава и против надзорот“ изјави Трајковски.

Тој ја демантираше информацијата на Цаноски дека временскиот период за спроведување на решението за отстранување на градбата бил многу мал.

„Во тој временски период тој ја немаше ни отпочнато постапката за спроведување на решението за отстранување на градбата. Напротив тој продолжи со градењето, така да инспекторката на лице место во присуство на инвеститорот во присуство на изведувачот констатира дека во тој временски период кога тој требаше да отпочне со отстранување на градбата тој имаше правено активност бетонирање на столбови. Видовме дека инвеститорот нема намера да започне постапка за отстранување на објектот, започнавме со прислино административно извршување на решението донесено од инспекторатот. Доколку инвеститорот имаше почнато активност за отстранување на објектот и побараше од општина Гази баба да му се продолжи рокот, ние ќе го продолжевме рокот“ рече Трајковски и праша по кој основен проект ја изведувал постоечката градба, дали е тоа бил основниот  проект кој е заверен од страна на општина Фази Баба или  тоа е основниот проект кој што е донесен за измени на основниот проект во текот на градбата.Цаноски, чиј комплекс „Космос“ од минатата недела се руши денеска најави дека ќе ја тужи државата пред судот во Стразбур.

Комплексот “Космос“ почна да се руши минатата недела бидејќи целиот објект, според општина Гази Баба бил надвор од рамките на проектот што го добил одобрението за градба што го издале службите на Општина Гази Баба.

Целата градба била повисока за метар и 43 сантиметри во однос на апсолутната кота којашто била измерена од геодетска фирма.

Комплексот се градеше покрај Вардар кај мостот “Близнак“, во непосредна близина на Универзитетот ФОН, кој исто така е во сопственост на Цаноски. Предвиден беше како луксузен станбено-деловен комплекс со 562 стана. /крај/фф