ОБСЕ порачува да запре „алармантното“ опаѓање на слободата на медиумите

Претставникот на ОБСЕ за слобода на медиумите, Дуња Мијатовиќ испрати писмо до министерот за надворешни работи, Никола Поповски во кое наведува дека „алармира за драстичниот пад на слободата на медиумите и продолжената репресија“.„За жал, ова е веќе четврт пат во последните два месеци како покренувам разни прашања поврзани со тековното опаѓање на слободата на медиумите. И покрај повторените повици до Владата да ја промени ситуацијата и да покаже респект за заложбите за слобода на медиумите на ОБСЕ, се чини дека ситуацијата се влошува,” се наведува во писмото на Дуња Мијатовиќ.Минатата седмица Советот на МРТ, јавниот сервис, соопшти дека го прекинува мандатот на сите седуммина членови на управниот одбор на МРТ на 31 јули. Мијатовиќ вели дека процесот на именување на нови членови се уште не е започнат и оти со тоа оваа одлука го остава управувачкиот одбор без членови и без можност да функционира.„Од суштинскo значење е кога Советот одлучува за измените во управувачкиот одбор на МРТ да го толкува законот во најдобар интерес во насока на одржување на еден политички и уредувачки независен јавен сервис,” пишува Мијатовиќ.Таа се осврнува и на отпуштањето на  Тамара Чаусидис, претседател на независниот синдикат на новинарите од работното место во телевизијата Алсат-М. „Иако овој чекор на Алсат-М ТВ би можел да се прикаже како чиста деловна одлука, всушност таа е индикација за високополитизираната природа на состојбите во медиумите и за стравот од критичките гласови”, посочува Мијатовиќ во писмото.„Овие дејствија се последните во серијата на вознемирувачки настани кои ја погодуваат слободата на медиумите во земјата“, додава таа.Претставникот на ОБСЕ за слобода на медиумите оценува дека Агенцијата за електронски комуникации, како што вели, контроверзно одлучила да ја повлече лиценцата за А1 ТВ.„Во меѓувреме се направија измените на Законот за радиодифузна дејност, со кои се зголеми бројот на Советот за радиодифузија од 9 на 15. Дополнителните 6 членови ќе бидат номинирани од тела кои се моментално под контрола на парламентарното мнозинство. Овие амандмани се спротивни на целта на законот, која се состои во обезбедување на политичката независност на регулаторната власт,” напиша Мијатовиќ во претходното писмо упатено до властите на 19 јули.Мијатовиќ им понуди на властите асистенција од страна на нејзината канцеларија при ОБСЕ за да и’ се помогне на земјата да го сврти овој како што вели вознемирувачки тренд и да ги исполни заложбите зацртани од ОБСЕ и меѓународните стандарди за слобода на медиумите.