Социјалдемократите нема да бидат дел од Централната манифестација за одбележување на државниот празник 8 Септември на плоштадот во Скопје, бидејќи сметаат дека тоа е обид на премиерот Никола Груевски за сопствена промоција и за величење на проектот Скопје 2014.

Социјалдемократите нема да бидат дел од Централната манифестација  за одбележување на државниот празник 8 Септември на плоштадот во Скопје, бидејќи сметаат дека тоа е обид на премиерот Никола Груевски за сопствена промоција и за величење на проектот Скопје 2014.

„Таа претставува обид на Никола Груевски за сопствена промоција и за величење на проектот Скопје 2014, за кој во изминативе години има длабока поделба во општеството. Тој не може да биде точка на обединување. Скопје 2014 во ниту една анкета не ја добива поддршката на граѓаните и служи за потсмев во меѓународната заедница“, истакна на денешната прес-конференција генералниот секретар на СДСМ, Андреј Петров.

Според него политички цинизам е намерата на власта да ја премести Декларацијата за независноста на државата од Собранието, во музејот на ВМРО.

„Местото на овој документ е во Собранието, а по 50 години од неговото донесување треба да биде депониран во Архивот на Македонија, согласно постоечките законските прописи. За жал вчера министерката за култура не соопшти колку ќе чини прославата. Оттука фактот што оваа прослава ја организираат тајно, само тројца луѓе околу министерката, прави наместо достојна прослава на 20 години од независноста,  власта да организира прослава на тоталитаризмот“, додаде Петров.

Најави дека СДСМ ќе присуствува на сите оние настани кои како што рече се логичен дел од прославата на еден ваков јубилеј, Свечената седница во Собранието на Македонија, Свечената академија во МНТ, на средбите во организација на Премиерот и Претседателот на Собранието со поранешни носители на функции во државата, на локални настани во прилог на јубилејот.

За овој голем настан, оваа година, од СДСМ забележуваат дека за жал не е формиран Одбор за одбележување, пракса која како што посочи Петров е втемелена во државата. „Наместо тоа, вчера на прес конференција на Министерството за култура јавноста ја слушна програмата за настанот. За ваков јубилеј, тоа е недозволено! За празникот кој треба да не обединува сите, независно од политичката, верска или национална припадност, не можеме да градиме национално единство со игнорирање на различното мислење“, рече Петров.

Во врска со организирањето на некакви паралелни прослави и манифестации, Петров рече дека тоа нема да се случи.

„СДСМ нема да даде ни најмала причина за делби на народот на партиска основа и нема да организира никакви паралелни манифестации и прослави, кои дополнително ќе ги делат граѓаните“, нагласи генералниот секретар на партијата./крај/бд