Разрешениот директор на Клиниката за неврологија Игор Кузмановски, за кого на социјалните мрежи беше објавено видео на кое се гледа како меша бела прашкаста материја, вчера на Фејсбук упати извинување и искажа длабоко каење за своите постапки.

„Во врска со објавите на социјалните мрежи изразувам длабоко каење и се извинувам поради постапката која се има случено далеку пред моето превземање на менаџирање на Клиниката за неврологија. Тоа е постапка со која не се гордеам и сметам дека е момент на моја слабост која не смее да биде пример. Секој човек во животот се соочил со слабости, предизвици и грешки. После ова знам дека оваа грешка нема да се повтори и сум подготвен да живеам со сите мои подеми и падови. Се повлекувам од функцијата директор на клинката задоволен со многуте резултати кои заедно ги постигнавме со мојот тим за краток период. Се извинувам на сите кои ги разочарав, и ќе продолжам да работам како доктор, она што највеќе го знам, сакам и живеам, да спасувам животи, помагам и работам за доброто на заедницата“, напиша Кузмановски.

По објавувањето на видеото на социјалните мрежи, денеска министерот за здравство Азир Алиу донел решение за разрешување на директорот на ЈЗУ Универзитетска клиника за неврологија, проф. д-р Игор Кузмановски.

„Во најкраток рок ќе биде именуван нов директор согласно законските процедури. Работата на Клиниката продолжува непречено“, посочија од Министерството.

Од ВМРО-ДПМНЕ вчера соопштија дека ја поддржуваат одлуката директорот на Клиниката за неврологија да биде разрешен, и бараат институциите да постапат во согласност со законот и утврдените процедури.

„Во врска со објавите на социјалните мрежи, за директорот на Клиниката за неврологија, д-р Игор Кузмановски, ВМРО-ДПМНЕ ја поддржува одлуката да биде разрешен од функцијата. Немаме сомневање дека јасно и недвосмислено институциите треба да постапат во согласност со законот и утврдените процедури. Извршувањето на јавна функција носи конкретни обврски и одговорности. Нашата заложба е правилата и законите да важат за сите подеднакво и управувањето на институциите мора да биде во согласност со вредносниот систем на одговорност за кој се залагаме и ќе продолжиме да се бориме“, се наведува во соопштението од ВМРО-ДПМНЕ.

Предлогот на Основното јавно обвинителство Битола е прифатен од Кривичниот совет на Основниот суд во Битола и на осомничениот сопственик на правното лице „Марковски компани“ му е определена мерка притвор, соопшти ЈОРСМ. Со ова, како што се наведува во информацијата, е уважена жалбата и аргументите изнесени од битолското обвинителство, особено во поглед на ризикот од бегство на осомничениот, и е преиначена одлуката на судијата на претходна постапка.

ОЈО Битола уште не е известено за одлуката по поднесената жалба на мерката куќен притвор за осомничениот раководител во РЕК, посочуваат од ЈОРСМ.

Битолското обвинителство вчера поднесе жалба за одлуката на Судот, со која се предвидуваше двајца од осумте осомничени во истрагата за злоупотреби со јавните набавки во РЕК „Битола“ да одат во куќен притвор. Од Обвинителството од Битола бараа мерка затворски притвор, а како причина за тоа се наведуваа ризици од бегство на осомничените. Притвор се бараше за еден од раководителите на Рудници во РЕК „Битола“ и за Борче Марковски, сопственикот на фирмата „Марковски компани“, која претходно ги добивала тендерите во Комбинатот и која како правен субјект се сомничи во случајот. Судот ја преиначи одлуката и одреди мерка притвор за Марковски.

Како што претходно информираа од ОЈО Битола, надлежниот јавен обвинител не се согласи со одлуката на Судот, имајќи ги предвид ризиците од бегство на осомничените, посебно што Марковски има значителен имот во друга држава. Од тие причини Обвинителството вложи жалба на одлуката на Судот и бара мерка затворски притвор.

На ваквата одлука на битолскиот суд реагирааше ВМРО-ДПМНЕ, од каде сметаат дека ваквиот потег е срамен, потенцирајќи дека нема да дозволат, како што велат, судството на СДСМ и ДУИ да ги ослободува криминалците.

– Срамна одлука на Судот, газдата на Марковски компани со стотици милиони местени тендери во РЕК наместо во затворски притвор, доби куќен притвор. Газдата на Марковски компани е фатен инфлагранти како испумпува пари од РЕК со документи и докази е заштитен од судот на СДС и ДУИ. Газдата на Марковски компани мора да каже каде завршија милиони евра од тендерите, дали крајна дестинација биле фирми на Заеви во Бугарија и Дубаи, дали со тие пари е финансирана СДС и дали со тие пари се купувани други бизниси на Заеви?, изјави Валентин Манасиевски од ВМРО ДПМНЕ.

Јавното обвинителство донесе Наредба за спроведување истражна постапка против осум физички и едно правно лице за продолжени кривични дела поврзани со јавни набавки во РЕК Битола.

Петмина службени лица во РЕК Битола, меѓу кои тогашниот директор на Комбинатот и четворица раководители и директори во ПЕ Рудници во РЕК Битола, се сомничат дека во текот на 2023 година како соизвршители сториле продолжено кривично дело „злоупотреба на службената положба и овластување“ така што не ја извршиле својата службена положба и овластување со намера на друг да му прибават корист, а да го оштетат комбинатот, односно спротивно на основниот рударски проект и на потребите на рудникот „Живојно“ организирале и реализирале јавна набавка за дислокација на погонски станици од рудникот „Осломеј“ во ПЕ Рудници – РЕК Битола.

Правното лице, сопственикот/управител и уште едно лице вработено во правното лице ДТПУ Марковски Компани се сомничат дека иако биле свесни дека работите не се извршени, доставувале фактури врз основа на кои од РЕК Битола незаконски наплатиле 106.200.000 денари со вклучен ДДВ, со што сториле продолжено кривично дело „злоупотреба на постапката за јавен повик и јавно-приватно партнерство“.

Со предистражните дејствија кои, како што информираа од Обвинителството, по наредба на јавниот обвинител ги преземала Управата за финансиска полиција во изминатите неколку месеци, се обезбедени докази кои даваат основано сомнение дека петмина осомничени – службени лица во РЕК Битола, односно тогашниот директор на комбинатот и четворица раководители и директори во ПЕ Рудници во РЕК Битола, во текот на 2023 година како соизвршители сториле продолжено кривично дело – Злоупотреба на службената положба и овластување според член 353 став 4 во врска со став 1 од Кривичниот законик.

„Оваа општина има огромен потенцијал. Но наместо да биде мотор на развојот, стана илустрација за стагнација“ – порача Каја Шукова од митингот во Гази Баба, каде што ја претстави својата програма за обнова на општината и за трансформација на Скопје.

Шукова најави дека ќе стави крајот на урбанистичкото дивеење и ќе воспостави систем што ги става луѓето во центарот на секоја одлука.

„Знаеме што ви недостасува. Не ни требаат анкети доволно е да прошетаме, да погледнеме околу себе, да ве слушнеме“, рече таа.

Првата голема мерка е поврзана со зелената инфраструктура, нови паркови и зелени зони, не само на цртеж, туку реално, во секоја населба. Централниот проект е обновата на Парк-шумата, која, според Шукова, треба да стане „бели дробови на градот“ со трим патеки, спортски терени, рекреативни зони, детски игралишта и простори за миленици.

Во делот на сообраќајот, ќе се воспостави поврзан, достапен и точен јавен превоз, а во Автокоманда е планирана изградба на катни гаражи со паметни системи, за како што рече „да не се губи време, пари и нерви во барање паркинг“.

Чисти улици, транспарентен систем за управување со отпад, нови контејнери и редовно одржување се дел од „реформите што не се за сликање, туку за вистински функционален град“.

„Гази Баба не смее да се гуши во отпад додека граѓаните плаќаат поскапи сметки и живеат во срамни услови“, предупреди Шукова.

Најчестото прашање што го добива, вели, е: „Што ќе правите со Вардариште?“

Одговорот: целосна трансформација на депонијата во модерен, контролиран и безбеден центар за селекција и рециклажа, без загадување, со ред и одговорност.

Шукова најави и крупни проекти од економски и урбан развој: прв Конгресен центар во Скопје со сали и бизнис капацитети, и нов Саем со 70.000 квадрати, простор за култура, спорт, изложби и настани.

„Тоа значи нови работни места и економија што се движи, не стагнира“, изјави таа.

Во програмата е вклучен и проект за велосипедска магистрала што ќе го поврзува градот од Студеничани до Сарај како дел од концептот „улици за луѓе“, а не за партиски тендери. Предвидени се и субвенции за велосипеди, со цел да се создадат здрави навики што не загадуваат.

Шукова упати и остра критика кон актуелната локална власт:
„Четири години нема градинки. Нема индустриска зона. Нема културни центри. Нема дрвја. Ветија 500.000, нема ни 5.000. Сè што има е сликање. Најава. Потоа молк.“

Наместо тоа, како што посочи, граѓаните добиле поскапа вода, поскап смет, поскапа канализација и најскапо од сè, разочарување.

„Не може скапи зборови да ја покријат евтината реалност“, изјави Шукова.

Таа се обврза на нов почеток со работа, отчетност и визија.

„Јас не сум тука да ви ветувам бајки. Сум работела со план. Ќе го водам градот со план. Имам визија, имам тим и имам јасна цел: да ја изградиме Гази Баба каков што заслужувате зелена, поврзана, функционална“ истакна таа.