На 58 повредени во пожарот во дискотеката „Пулс“ во Кочани веќе им е дадена компресивна облека и носењето ги дава резултатите. Директорката на кочанската болница, Катерина Паниќ-Мирчовска, вели дека тие ќе добијат и втор чифт, а таква облека ќе добијат сите повредени на кои што им е потребна.

„Во однос на компресивната облека, можам да ги кажам првите искуства од терен. На 58 повредени веќе им е дадена компресивната облека и тие ја носат. Веќе има позитивни видливи промени на самите лузни. Кога ќе го добијат вториот чифт компресивна облека, остануваат препораките за носење на облеката во период од 23 часа заедно со компресивни завои. Ќе се потрудиме да ги почитуваме препораките на компанијата која е производител на компресивната облека и препораките на специјалистите што подолго време работат со лузни дека ќе им бидат потребни по два чифта компресивна облека за шест месеци и да се менуваат во следните две години“, вели директорката Паниќ-Мирчовска.

Компресивната облека, повредените, во зависност од потребите, ќе ја добиваат во континуитет од Фондот за здравствено осигурување и за неа нема да плаќаат. Освен 58 повредени, кои добија по еден чифт, земени им се мерки за облеката на уште 14 пациенти и таа се изработува.

Директорката Паниќ-Мирчовска најави дека за две недели претставници на компанијата од Германија, која ја изработува облеката, ќе дојдат во Кочани за да ги чујат забелешките за мерките од повредените што ја носат. Доколку кај сите мерките се соодветни, ќе почне изработката на вториот чифт.

„Компресивната облека им овозможува да ги изведуваат вежбите на физикална медицина, им овозможува да вршат секојдневни активности. Тоа е дополнителна заштита и од сончева светлина бидејќи содржат заштитен фактор 30 во самиот материјал, од кој се изработени. Тоа ќе им овозможува непречена работа со екстремитетите. Препораките се да вежбаат и во домашни услови со компресивната облека“, рече директорката Паниќ-Мирчовска.

Таа извести дека во болницата во Кочани стигнале кремовите потребни за третман на изгореници и најави дека ќе стигнуваат во зависност од потребите. Половина од стигната пратка е веќе однесена во Пониква, каде што утре треба да пристигнат пациентите. Директорката вели дека во болницата стигнале и 95 парчиња од лепенките што пациентите долго време ги барале и ќе продолжат да стигнуваат на неделно ниво.

Се прават списоци за контролни пулмолошки прегледи, продолжуваат терапиите со плазма збогатена со тромбоцити во болницата, се очекуваат маските за лице, врат и за глава направени со 3Д-скенирање на изгорениците, а директорката апелира родителите да не се мачат да бараат специјалисти за естетска хирургија во странство оти тие се во преговори такви специјалисти да дојдат во Кочани.

„Има соработка со ‘Отобок’, тоа е компанија од Германија што долго време се занимава со изработка на силиконски материјали, кои помагаат во ортотиката и во протетиката. Разговарано е со специјалист кој што работи на изработка на естетски, силиконски прсти. Разговарано е со нив како привремено решение додека се консултираат специјалисти по пластична хирургија во однос на оние дечиња што имаат ампутација на разно ниво на прстињата за тоа што каков би бил планот за понатаму. Секако, не е завршено нивното лекување и на оние што се хоспитализирани на Клиниката за пластична хирургија и на оние што ги очекуваме дополнително да се вратат од странство. Следува и реевалуација и во зависност од потребите, ќе се потрудиме, доколку е можно, и специјалистите да им ги доведеме тука за да се намалат и трошоците за патувањата, да се намали малтретирањето на пациентите со одење и барање клиники во странство“, вели директорката Паниќ-Мирчовска.

Во текот на престојот на Пониква, за повредените, кои сè уште се ученици, планирани се средби со нивните наставници, педагози и психолози од училиштата во кои учат за продолжување на образовниот процес.

Во моментот се одвива реконструкција на просторот за физикална медицина во кочанската болница, со вкупна површина од 350 квадратни метри.

Рокот за завршување на работите е предвиден во наредните три-четири недели.

Владината портпаролка Марија Митева информира дека е почнато со поставување нови прозорци, целосно нова електрична инсталација и нова водоводна и канализациска мрежа.

Реконструкцијата ќе продолжи со хидроизолација на објектот, поставување комплетно нова вертикала на водоводната и на канализациската мрежа, која ги поврзува и горните оддели над физикалната медицина – конкретно хирургија, гинекологија и неврологија, порамнување и обновување на подот и поставување нови врати.

„Особено важно што цениме како Влада дека е потребно да се нагласи оти по многу години се оспособува хидрантската мрежа, која беше целосно нефункционална, и во тек е поставување нов противпожарен систем, неопходен елемент за безбедноста на пациентите и на медицинскиот персонал. Ова не е само реконструкција – ова е јасен сигнал дека Кочани добива системска грижа“, рече Митева.

Информира и дека се преземаат сериозни чекори за подобрување на условите во Пониква, каде што од утре ќе бидат примани и пациенти.

Министерството за спорт целосно ги опреми двете игралишта за рекреација, поставени се комарници, кои се од суштинско значење за заштита на пациентите во оваа фаза. Спроведена е и комплетна дезинфекција, дезинсекција и дератизација, вклучително и на шахтите околу објектот, во соработка со Центарот за јавно здравје – Кочани.

Министерството за земјоделство, шумарство и водостопанство ги информира сите заинтересирани дека е објавен Јавен повик бр. 02/2025 за доставување на барања за исплата на средства од Програмата за финансиска поддршка во рибарството и аквакултурата за 2025 година.

ДОСТАПНИ МЕРКИ ЗА ФИНАНСИСКА ПОДДРШКА:

МЕРКА 1 – Финансиска поддршка во рибарството:

• Потточка 1.6 – Дополнителна заштита на рибите во риболовните води:

o до 30.000 денари за заштита на риболовните ревири и рекреативни зони;

o до 150.000 денари за заштита на риболовни зони;

o до 400.000 денари за заштита на риболовни подрачја.

Средствата од Потточка 1.6 се наменети за надомест на прифатливи трошоци за дополнителна физичка заштита на рибите која се врши во време на природен мрест на рибите.

• Потточка 1.7 – Набавка на опрема за заштита на рибите во риболовните води (до 30.000 денари);

Средствата од Потточка 1.7 се наменети за надомест на прифатливи трошоци за набавка на опрема за видео надзор на риболовните води.

• Потточка 1.8 – Финансиски средства за отстранување на постоечките нарушувања на животната средина (до 60.000 денари).

Средствата од Потточка 1.8 се наменети за надомест на прифатливи трошоци за изведување на акции за чистење на препреки и отстранување на цврстиот отпад од и до риболовните води.

Право на користење на овие средства за МЕРКА 1 имаат концесионерите на рибите од риболовните води. Еден концесионер може да користи средства само за еден одреден период на природен мрест и забрана за риболов

МЕРКА 2 – Финансиска поддршка во аквакултурата:

• Потточка 2.2 – Финансиска поддршка за порибителен материјал (50% од вредноста на набавениот или сопствениот подмладок).

Средствата од Потточка 2.2 се наменети за набавка на порибителен материјал за насадување на рибниците во период од 10 февруари до 31 мај и од 1 јули до 31 октомври 2025 година.

Право на користење на овие средства од Потточка 2.2 имаат:

• Субјекти кои се регистрирани за дејност аквакултура и се запишани во регистарот на одгледувачи на риби што се води во Министерството за земјоделство, шумарство и водостопанство.

• Субјекти кои поседуваат дозвола за производство на порибителен материјал од рибник наменет за промет дување на рибникот.

МЕРКА 4 – Развој на нови пазари и промотивни кампањи:

• Потточка 4.1 – Финансиска поддршка за промоција на рибарство ;

Средствата од Потточка 4.1 се наменети за надомест на трошоци за промоција на производи од рибарство за традиционална посебност.

Право на користење на овие средства од Потточка 4.1 имаат рибарски и риболовни здруженија и концесионерите на риби.

• Потточка 4.2 – Финансиска поддршка за маркетинг и промоција на аквакултурно производство

Средствата од Потточка 4.2 се наменети за надомест на трошоци за промоција и маркетинг на аквакултурното производство и спроведување на национални кампањи за промоција и маркетинг за производи од аквакултура.

Право на користење на средства од Потточка 4.2 имаат субјекти регистрирани за дејност аквакултура и се запишани во регистарот на одгледувачи на риби што се води во Министерството и/или организации на производители запишани во Регистарот на организации на производители кој се води во Министерството.

Министерството ги повикува сите заинтересирани субјекти да се запознаат со деталните услови и критериуми утврдени во Јавниот повик и навремено да ги достават своите барања.