Судскиот процес против Игор Спасов кому му се суди за убиството на Мартин Нешковски во Основниот суд 1 денеска се одвиваше со големо полициско обезбедување во и надвор од судот. Видно беше дека МВР го следи будно целиот настан и со камера пред и во судот.

Судскиот процес против Игор Спасов кому му се суди за убиството на Мартин Нешковски во Основниот суд 1 денеска се одвиваше со големо полициско обезбедување во и надвор од судот. Видно беше дека МВР го следи будно целиот настан и со камера пред и во судот. Три часа пред судиите обвинетиот Игор Спасов детално раскажуваше што се случило вечерта кога бил на задача да го обезбедува Премиерот и други ВИП личности на прославата на победата на ВМРО –ДПМНЕ на последните парламентарни избори. Неколку пати повтори дека по телефонска наредба бил на работна задача. Спасов тврди дека го удрил Нешкоски, но не за да го претепа или убие туку за да го освести. Бркотницата со Нешкоски била бидејки момчето заедно со неколкумина другари сакале да се приближат на премиерот и да се качат на бината каде тој говорел. Бил спречен од Спасов по што Нешкоски почнал да бега, а Спасов поради сомнителното однесување на момчето тргнал по него да го уапси. Но, Нешкоски се сопнал на кабли и со лицето паднал на асфалтот. Според одбраната на Спасов, Нешкоски бил онесвестен и тој воопшто не знаел дека е во животна опасност. “Да знаев дека е во критично ќе го однесев на раце во болница. Јас му помагав да се освести”. Само овој дел е ист со исказот на сведокот дека Нешковски се сопнал од кабли и паднал. Девојката кога го видела целиот настан со својот изказ предизвика огромна реакција во судницата, а судиите за да се разјасни ситуацијата го прекинаа на кратко процесот. Таа гледајќи кон Спасов рече: ”Овој човек прв пат го гледам, тепачот беше висок два метри носеше пиштол и имаше тетоважа на раката. “Го тепаше со клоци и тупаници, а Мартин со рацете на главата викаше не ме тепајте ве молам не ме тепајте”, сведочеше првиот сведок на обвинителството. По завршувањето на денешното прво рочиште адвокатот на Спасов рече дека изјавата на сведокот дека имало друго лице на местото треба да се утврди во постапката , но тоа не значи дека негираат дека Спасов бил присутен до телото на Нешкоски. За писмото до министерката Гордана Јанкуловска во кое Спасов бара МВР да потврди дека бил на работна задача адвокатот Ване Андреев појасни дека било лично и немало врска со постапката. Реагираше и братот на убиениот Нешковски кој тврди дека: “Обвинетиот во многу наврати сакаше да каже нешто, но беше спречен од судиите повеќе пати и го вратија да премолчи. Знаеме дека од самиот почеток дека сите кријат, немаме докази и снимки од Плоштадот на јавно место каде има ВИП личности и видео надзор. Обвинителството е целосно замолчено. Сега и обвинетиот сака да каже кој наредил да го стори тоа и е спречен од судиите”, тврди тој.  Ваквата реакција е бидејки Спасов сакаше да открие службени тајни, но судот тоа не му го дозволи. Дел од службената тајна е кој ја дал наредбата да биде во периметарот на обезбедување на Премиерот по 23 часот кога му завршила работната смена. Судењето продолжува в понеделник. крај.км