“Благодарност од македонскиот до американскиот народ 2011“ беше насловот на третата по ред манифестација која се одржа во свечениот амфитеатар на центарот Роналд Реган во главниот град на САД

“Благодарност од македонскиот до американскиот народ 2011“ беше насловот на третата по ред манифестација која се одржа во свечениот амфитеатар на центарот Роналд Реган во Вашингтон. Со овој концерт годинава беше одбележана и 20 годишнината од независноста на Република Македонија во главниот град на САД. На концертот настапија уметниците Борис Трајанов, во придружба на Дарко Мариновски (пијано), Венко Серафимов (гитара), Бобан Мирковски (пијано) и Александар Икономов (гитара) со програма која опфаќаше стари македонски народни песни, џез композиции од американски автори и извадоци од познати класични дела. Настапот на македонските уметници предизвикаа овации кај публиката. Особено воодушевување кај присутните гости предизвикаа македонските народни песни, дел отпеани на македонски, дел во превод на англиски јазик. Поздравни обраќања имаа Зоран Јолевски, амбасадорот на Република Македонија во САД, Зоран Јолевски и заменикот помошник државен секретар за европски и евроазиски работи, амбасадорот Филип Рикер. Амбасадорот Јолевски се заблагодари за подршката и соработката на САД уште од првите денови по осамостојувањето на Македонија и потенцира дека нема подобар знак за партнерство и доверба меѓу две земји од тоа кога нивните војници се борат рамо до рамо за истите вредности и идеали во трети земји.    Амбасадорот Рикер го пренесе интересот на САД за демократска и просперитетна Македонија и ја нагласи цврстата американска поддршка на патот кон европското и евроатланско интегрирање на Република Македонија. Оваа традиционална манифестација прерасна во препознатлив белег на македонската амбасада во Вашингтон во претпразничниот период на крајот од годината. Над 250 гости од администрацијата, конгресот, дипломатскиот кор, невладината и бизнис сцената како и од македонската дијаспора и годинава имаа можност да уживаат во дел од богатата македонска култура.  Меѓу гостите беа и министерот за странски инвестиции Бил Павлески, конгресменот Роберт Адерхолт и извршниот директор во Светска банка Руд Треферс. Настанот беше организиран во соработка со Министерството за култура на Република Македонија и бизнисменот со македонско потекло Енди Пејков и компанијата Сивус.      Благодарница за ВермонтНа концертот беше доделена Благодарницата од министерот за одбрана Фатмир Бесими  до Националната гарда на Вермонот. Благодарницата во име на министерот ја предаде амбасадорот Зоран Јолевски на генералот Вилијам Рој.  Во Благодарницата  се истакнува долгогодишната блиска сорабтока и пријателство меѓу државата Вермонт и Република Македонија. Понатаму се истакнува дека оваа соработка е проширена во повеќе области, како што се образованието, културата, здравството….Амбасадорот Рикер го поздрави напредокот кој државата го постигна во овие 20 години ставајќи посебен акцент на придонесот на Република Македонија во ИСАФ и посака што поскоро заокружување на процесот на интегрирање на земјата во ЕУ и НАТО.  Генерал Рој го истакна значењето и улогата на македонските војници во Авганистан и ја нагласи нивната стручна подготвеност и храброст на терен.