Премиерот Никола Груевски денеска се сретна со претседателот на Јапонската агенција за меѓународна соработка, Садако Огата.

Премиерот Никола Груевски денеска се сретна со претседателот на Јапонската агенција за меѓународна соработка, Садако Огата.

На средбата, како што информираат од Владата, е изразено задоволство од развојот на билатералните односи меѓу двете земји кои ги карактеризира пријателство и меѓусебно разбирање, при што било нагласено дека постои огромен неискористен потенцијал за натамошно унапредување и продлабочување на соработката во сите области од заеднички интерес, а особено во економската сфера.

Премиерот Груевски изразил благодарност за досегашната техничка помош доделена преку програмите на Јапонската агенција за меѓународна соработка, кои во Македонија се имплементираат повеќе од десет години, а меѓу кои неизбежно се истакнуваат проектите за подобрување на медицинската опрема и изградбата на хидро-системот „Злетовица“.

Воедно, премиерот Груевски изразил задоволство и од новите проекти за 2012 и 2013 година, како што е проектот за подобро менаџирање со отпад, обуките за промоција на туризмот и грант во областа на културата за поддршка на Охридското културно лето, при што нагласил дека сè уште постои простор за зголемување на меѓусебната соработка.

Притоа била пренесена подготвеноста на македонската страна за натамошни меѓусебни консултации за согледување на можностите за започнување нови инфраструктурни проекти кои ќе придонесат за ублажување на климатските промени и заштита на животната средина, преку искористување на поволните услови за финансирање од страна на Јапонската официјална развојна програма за кои Македонија ги исполнува квалификационите услови.

Во тој контекст, премиерот Груевски ја информирал Огата дека македонската страна е подготвена да предложи два проекти, и тоа проект за модернизација на ТЕЦ Битола кој има за цел намалување на емисиите на штетни гасови во воздухот согласно ЕУ стандардите, како и проект за модернизација и доизградба на колекторскиот систем околу Охридското Езеро кој има за цел подобрување на еколошката заштита на охридскиот езерски регион.

Вкупната вредност на двата проекти се проценува дека изнесува нешто над 100 милиони евра и во следниот период ќе следуваат консултации за утврдување конкретни чекори за нивна операционализација.

На средбата премиерот Груевски ја информираше г-ѓа Огата и за останатите детали од точките кои што претходниот ден се разговараа со јапонскиот премиер Нода, како и за организирањето на двата бизнис-форуми, во Токио и Осака, на кои се презентираат поволностите и компаративните предности кои што ги нуди македонската економија и можноста јапонските бизнисмени да ја искористат Република Македонија како порта за водење на нивниот бизнис во европски рамки.

Владината делегација попладнето замина за Осака, каде што утре, на последниот ден од посетата, во соработка со Јапонската надворешна трговска организација ќе се организира и вториот бизнис форум пред јапонските инвеститори. /крај/со/ач