Бугарскиот европратеник Кристијан Вигенин преку писмо до шефот на дипломатијата Ставрос Димас ја повика Грција да направи, како што вели, гест на добра волја, и да се согласи Македонија да започне преговори за членство со Европската Унија по две од вкупно 35 поглавја.

Бугарскиот европратеник Кристијан Вигенин преку писмо до шефот на дипломатијата Ставрос Димас ја повика Грција да направи, како што вели, гест на добра волја, и да се согласи Македонија да започне преговори за членство со Европската Унија по две од вкупно 35 поглавја: “Судство и основни права“ и “Правда, слобода и безбедност“.

“Мислам дека на крајот граѓаните на Македонија се оние кои ги чуствуваат негативните последици од блокирањето на преговорите за членство. Се плашам дека тоа може да го промени односот на луѓето кон европската иднина на нивната земја и ЕУ во целина, и да ја залади нивната желба за реформи. Покрај тоа, тековната безизлезна ситуација во спорот со името во иднина би можела да има последици и за регионалната стабилност и безбедност “, изјави Вигенин, информираат од неговиот кабинет.

Според Вигенин, компромис од страна на Грција токму во овој момент би ја зајакнало довербата во политиката на проширување на ЕУ и би дал позитивен сигнал кон сите земји од регионот. Таквиот чекор, смета бугарскиот европратеник, би ја покажал зрелоста и способноста на една земја-членка на ЕУ да дава пример за однесување.

“Верувам дека почетокот на преговарачкиот процес за овие две поглавја ќе обезбеди подобри можности за решавање на многу од спорните прашања во односите на Македонија со соседните земји, вклучувајќи ја Грција“, рече Вигенин.

Предлогот на Вигенин е во контекст и на иницијативата на Европската Комисија, која во октомври предложи најтешките поглавја (23 и 24) да бидат отворани на почетокот од преговарачкиот процес, со цел да се даде доволно време на земјите да покажат убедлив напредок, а направените реформи да дадат видливи резултати. /крај/vigenin.eu/ач