Пресудата на Меѓународниот суд на правдата во Хаг треба да послужи како мотив и поттик за Македонија и Грција да работат на взаемно прифатливо решение за спорот со името, смета вицепремиерот за европски прашања Теута Арифи.

Пресудата на Меѓународниот суд на правдата во Хаг треба да послужи како мотив и поттик за Македонија и Грција да работат на взаемно прифатливо решение за спорот со името, смета вицепремиерот за европски прашања Теута Арифи.

Арифи, реферирајќи на денешната заедничка седница на Националниот Совет за евроинтеграции и собраниската Комисија за надворешна политика, смета дека 2011 била успешна во однос на нејзината дипломатска активност и реализацијата на обврските. Изрази задоволство од пресудата на хашкиот суд, но посочи дека дијалогот меѓу соседите е начинот што може да доведе до решение.

„Ние треба да бидеме задоволни од пресудата на Меѓународниот суд на правдата во Хаг, но во исто време треба да го имаме в предвид фактот дека се работи за политичко прашање коешто доста чувствително, во коешто се бара желба и политичка волја којашто би била обострана за да се надмине овој проблем. Затоа, задоволни од одлуката на хашкиот суд, оваа одлука треба да биде мотив или пак да биде поттик за двете страни да се движат кон едно заедничко решение. Сметам дека дијалогот меѓу соседите е тоа што треба да води право кон договор и спогодба, а не кон недоразбирање“, рече Арифи.

За опозицијата, по правната победа во Хаг, Македонија неколку дена подоцна доживеала политички пораз во Брисел, откако земјата не се најде на дневен ред на Европскиот Совет. Покрај спорот со името, според нив, причина за стоење во место е и застојот во реформите на домашен план.

„Во период од само неколку дена имавме победа на меѓународното право и времената спогодба и дипломатски пораз наш бидејќи не успеавме дури ни да се отвори дискусијата за Република Македонија на состанокот на премиерите. Практично не се ни квалификувавме за состанокот, а камоли за почеток на преговори. Тоа покажува дека Македонија веќе завршува 12-то претседателство со кандидатски статус без почеток на преговори. Тоа стоење во место не чини и пари и проблеми“, рече Радмила Шекеринска – Јанковска, претседател на НСЕИ.

„Брисел и Европската Унија се помалку не есапи како сериозен кандидат за влез во Европската Унија. Вие госпоѓо вицепремиер бевте во Брисел чинам два или три пати. Се надевам дека тоа не беше роуд-шоу како што правеше премиерот, туку навистина сфативте во каква ситуација е Република Македонија во последните неколку години, особено последната година“, рече пратеникот Гордан Георгиев.

Неосновани обвинувања – беше оценката на пратениците од власта на обвинувањата од опозицијата. Сметаат дека главна пречка за интеграцијата на Македонија е блокадата од Грција. Побараа активен ангажман и лобирање, особено во контекст на пресудата на хашкиот суд, со цел следната година земјата да добие датум за старт на пристапните преговори со унијата и членство во алијансата.

„Процесот не треба да се остави да тече само меѓу преговарачите, туку и ние треба да бидеме активни чинители, бидејќи ова прашање ја обременува целата земја, сите граѓани на Република Македонија и прави застој во нашите европски и евроатлански интеграции. Би сакала да упатам апел со сите собраниски тела максимално да се ангажираме за самитот во Чикаго, да можеме да лобираме Република Македонија да стане дел од НАТО-алијансата“, рече Силвана Бонева, потпретседател на НСЕИ.

„Сметам дека Европската Унија треба да биде информирана во секоја можна прилика дека највисоките официјални лица од официјална Атина јавно ја искажаа својата неспремност да ги продолжат или да вложат свој личен и политички капитал во преговорите за резрешување на спорот којшто Грција го има со уставното име на Република Македонија. Од таа гледна точка, уште поголема е причината да се лобира, да се дејствува и да се бара она што Македонија го има заслужено, а тоа е да добие одлука за почеток на преговорите за членство“, рече пратеникот Антонио Милошоски.

На заедничката седница на НСЕИ и КЕП беа разгледани иформациите за усвојувањето на правото на Европската Унија за девете месеци од годината. /крај/ач