Бранко Црвенковски, лидерот на СДСМ партија во која починатиот претседател Киро Глигоров имаше книшка со број 001, денеска во својот говор на комеморацијата по поворд смртта на Глигоров се осврна на животот на, како што го нарече, својот пријател и учител.

Бранко Црвенковски, лидерот на СДСМ партија во која починатиот претседател Киро Глигоров имаше книшка со број 001, денеска во својот говор на комеморацијата по поворд смртта на Глигоров се осврна на животот на, како што го нарече, својот пријател и учител. Црвенковски на почетокот потенцираше дека под лидерство на Киро Глигоров државата се избори за својата независност и меѓународно признавање без војна и крвопролевање, единствена од сите републики на поранешна Југославија.„Па само ова е доволно да се стане мит, да се стане легенда”, рече Црвенковски. „Судбината одреди во почетокот на 1990те, Македонија да ги има најстариот претседател и најмладиот премиер во Европа. Киро честопати на шега ќе ми речеше: „Бранко, јас и ти заедно во просек сме тамам“, рече Црвенковски. Во своето обраќање Црвенковски се задржа на неколку моменти од историјата и позициите во кои се нашол Глигоров и државата. „Го обвинуваа него а и нас дека референдумското прашање од 8ми септември било југоносталгичарски формулирано. А мотивите беа сосема спротивни. Прашањето беше така поставено за да референдумот со сигурност успее и Македонија со сигурност стане независна држава”, истакна Црвенковски. „Го обвинуваа него а и нас дека сме предавници и плашливци затоа што сме дозволиле ЈНА да ја напушти Македонија со сето оружје и целокупната опрема. А неговиот одговор беше толку човечен и логичен: „Колку тенкови или камиони вреди  еден човечки живот? Нема да дозволам за куп железо да ни гинат луѓето и да ни страда народот.“, рече Црвенковски. Црвенковски за Глигоров вели : „Киро Глигоров беше сам за себе историја што чекори, ем жив човек, ем споменик за цела една епоха”.„Тој не знаеше да нареди, тој знаеше да убеди. Од него луѓето кога ќе згрешеа не се плашеа туку се срамеа. Од средбите со него можевте да излезете со неприфатени барања но секогаш со чувство дека сте докрај испочитувани. Имаше време за секого. Јас во животот немам сретнато друга личност со таква дарба трпеливо да слуша и да сослуша”, истакна Црвенковски додаваќи дека претседателт на својот 90 –ти роденден му се пожалил дека многу бил навредуван и напаѓан, на што Црвенковски му одговорил дека историјата ќе ја каже неговата вистинска голема вредност за Македонија и македонскиот народ./крај/мф/км