Доајенот и ненадминатиот мајстор на фотографијата во Македонија, Благој Дрнков почина вчера на 98 годишна возраст во родниот град Скопје.

Доајенот и ненадминатиот мајстор на фотографијата во Македонија, Благој Дрнков почина вчера на 98 годишна возраст во родниот град Скопје.Како неуморен истражувач и документарист на македонската традиција, уметност и култура во своето богато фотографско творештво посветено на уметничката фотографија и создавано во текот на целиот свој животен век, Благој Дрнков изгради една ретка, трајна, ненадминлива и вечна фотографска колекција на Македонија. Користејќи го првиот свој фотографски апарат „цајсикон 912“, па сè до последните дигитални апарати „Канон“ и „Никон“, тој ги овековечи скоро сите случувања, обичаи, занаети, уметнички дела, икони, објекти и предели на Македонија и создаде од нив лесно пренослива визуелна слика и имиџ на Македонија. Тоа е неговата Македонија „заробена“ во мигот кога неговото око и неговиот објектив оцениле дека во тој миг тоа е тоа – чувството, окото и мајсторството на владеењето на занаетот преку кои се пренесеува она што треба да се види и она што треба да остане како трајен спомен и вредност. Со фотографија започнува да се занимава уште како ученик, кога по завршување на средното образование, се вработува во фотографскиот дуќан „Фотоаматер“, кога и ја купува својата прва филмска 9,5 мм камера и сопствен кинопроектор, а од 1938 година станува и сопственик на „Фотоаматер“. Во текот на својата кариера, тој бил директор на Филмската дирекција на Македонија (ФИДИМА) и прв филмски дописник и снимател за „Филмске новости“ од Македонија. Целиот животен, фотографски и филмски опус на Дрнков е една голема приказна за Македонија, во главно од 1940 година до почетокот на 21 век. Започнувајќи од неговиот прв филм „Борба на петли“ (1935) па сè до последниот, и огромната колекција на фотографии се историски сведок и слика на Македонија. Како за пример неговите фотографии „Македонец“ и „Бишка“ (Македонски голф) го обиколија светот и ја доближија Македонија до него.бардот на македонската фотографија е добитник на повеќе награди меѓу кои наградата „11 Октомври“ за животно дело во полето на филмот и фотографијата, награда за животно дело од Друштвото на ликовни уметници за применета уметност на Македонија, во 1975 година, Медал за заслуги за Македонија во 2008 година и титулата „Зограф на културата на РМ“, додеделено од Министерството за култура во 2011 година.Дрнков е единствен македонски автор чие творештво е одбележано 1985 година, во Интернационалната енциклопедија на фотографи (Photographes encyclopedia international: 1839 to present), објавена во Швајцарија и во која се застапени најпознатите фотографи во светот од почетоците на  фотографијата до денес. /крај/