Градот Скопје денеска соопшти дена екипите на зимската служба непрекинато биле на терен во изминативе две деноноќија и го расчистувале снегот од градските сообраќајници со 16 возила грејдери и соларки.

Градот Скопје денеска соопшти дена  екипите на зимската служба непрекинато биле на терен во изминативе две деноноќија и го расчистувале снегот од градските сообраќајници со 16 возила грејдери и соларки. Градоначалникот Коце Трајановски, на денешната средба со медиумите, информираше дека поради непрекинатите врнежи на снег вклучена е дополнителна тешка градежна механизација и на терен се излезени уште три грејдери.„Би сакал да нагласам дека градските улици се проодни и сообраќајот се одвива без застој“, изјави Трајановски, информирајќи дека во изминатата ноќ на критичните сообраќајни точки во градот фрлени се околу 90 тони сол. „Во расчистување на снегот се вклучени 120 работници од ЈП „Комунална хигиена“ коишто го расчистуваат снегот од тротоарите и пристапните патеки до здравствените и јавните установи, на мостовите, на плоштадите, на главните сообраќајници и во Старата чаршија“ рече Трајановски, најавувајќи дека  дополнително  ќе бидат вклучат и сезонски работници. Градоначалникот информираше и дека од Јавното претпријатие „Водовод и канализација“ на терен е излезено со 16 мобилни тимови и 70 работници коишто ги одмрзнуваат и чистат сливниците што треба да ја прифатат водата од одмрзнатиот снег. „Работниците на ЈП „Паркови и зеленило“ со 70 работници интервенираат на тротоарите, пешачките патеки и автобуските стојалишта, како и приодите кон јавните институции. Екипи на „Паркови и зеленило“ го тресат снегот и од крошните на дрвјата и од грмушките за да се спречи кршење на гранките и оштетување на зеленилото во дрворедите.Градоначалникот Трајановски нагласи дека според Програмата за зимско одржување на сообраќајниците во Скопје, Градот Скопје е задолжен да ги расчистува снежните наноси од магистралните и собирни улици (булеварите и собирните улици) на подрачјето на градот. „Сакам да ги повикам моите колеги градоначалници на десетте скопски општини активно да се вклучат во расчистувањето на снегот од општинските, сервисни, улици за коишто се надлежни, и да овозможат нормално одвивање на сообраќајот. Ги повикувам и граѓаните и стопанските субјекти да ги почитуваат законските обврски и да го расчистуваат снегот пред влезовите во своите станбени објекти и пред деловните простории и да спречат појава на голомразица“, рече градоначалникот Трајановски.. Тој напомена дека на терен се излезени 10 комунални инспектори и 19 комунални редари од Градот Скопје коишто се задолжени да ги опоменуваат и казнуваат физичките и правните лица поради нерасчистен снег на приодите кон нивните станбени и деловни простории. „Досега се изречени 250 опомени. Субјектите се придржуваат кон опомените и го расчистуваат снегот. Не е изречена ниту една казна. Би сакал да апелирам до граѓаните да возат крајно внимателно и да се придржуваат кон условите на патот и поставената патна сигнализација“, изјави Трајановски.  /крај/со/ап/