Гордана Јанкулоска останува министер за внатрешни работи. По целодневна дебата пратениците со 56 гласа „против“ и 33 гласа „за“ не ја изгласаа интерпелацијата за нејзината работа која беше поднесена од група пратеници од

Гордана Јанкулоска останува министер за внатрешни работи. По целодневна дебата пратениците со 56 гласа „против“ и 33 гласа „за“ не ја изгласаа интерпелацијата за нејзината работа која беше поднесена од група пратеници од опозицијата.

Седницата заврши со меѓусебни довикувања откако пратеникот на ВМРО-ДПМНЕ, Павле Саздов ја искористи својата последна реплика за да побара едноминутно молчење, за како што рече смртта на политичката кариера на пратеникот на НСДП, Тито Петковски.

Инаку Петковски беше еден од предлагачите на интерпелацијата, која како што рече во своето излагање ја поднесуваат поради игнорантскиот однос на Јанкулоска кон пратениците, случајот „Кампања“ во кој што беше упасен лидерот на Обединети за Македонија Љубе Бошкоски, политичката пресметка на власта со неистомислениците, убиството на Мартин Нешкоски, тепачката на плоштадот, инцидентот на Калето, уривањето на комплексот „Космос“ на пратеникот од опозицијата Фијат Цаноски.

За Петковски МВР е симбол за политички пресметки со неистомислениците, министерство кое не прифаќа никаква контрола во своето работење.

„Партијата на власт преку нејзините изврши функционери се пресметува со политичките неистомисленици и критичари на недемократскиот начин на владеење. Ако не е така, зошто истиот однос го немате и кон ВМРО-ДПМНЕ која нема доказ за потеклото и покритие за над три милиони евра употребени во изборната кампања. За Љубе Бошкоски седум години затвор, арно ама за криминалот на ВМРО-ДПМНЕ нема никаков доказ“ рече Петковски.

Министерката за внатрешни работи, Јанкулоска вели дека не е точно тврдењето на Петковски дека му се забранувало да изврши увид во документацијата за прислушувањето на случајот „Кампања“.

„Прво забрана не постои, или можеби само постои во мислите на Петковски, прислушување не постои, може само во мислите на Петковски. Во дописот кој МВР го испрати до Петковски, јасно се вели МВР ви стои на располагање 24 часа на ден доколку сакате да остварите посета“ рече Јанкулоска.

Додека пратениците се обвинуваа меѓу себе, пред Собранието протестираше семејството на Мартин Нешковски и граѓани незадоволни од работата на Министерката, кои побараа нејзина оставка.

Тие побарале од спикерот Трајко Вељаноски да ја следат седницата од галеријата во Собранието, но ова нивно барање беше одбиено.

„Не сакам да се злоупотребуваат чувствата на едно семејство“ рече Вељаноски. Ова е трета поднесена интепрелација за Јанкулоска./крај/фф