Министерката за внатрешни работи, Гордана Јанкулоска, по двојното убиство што го изврши полицаецот во Гостивар, кога беа убиени две момчиња Албанци, апелира овој настан да не се злоупотребува како поттик за промоција на

Министерката за внатрешни работи, Гордана Јанкулоска, по двојното убиство што го изврши полицаецот во Гостивар, кога беа убиени две момчиња Албанци, апелира овој настан да не се злоупотребува како поттик за промоција на меѓуетнички тензии и нетрпеливост, бидејќи според неа, овој настан воопшто не е поврзан со меѓуетничките односи.

Таа ги отфрла обвинувањата од Општина Гостивар дека Министерството во овој случај постапувало пристрасно.

„Мислам дека е неупатно да се прават обиди политички или на кој и да е друг начин да се профитира од овој настан, бидејќи се работи за еден настан во кој двајца луѓе го загубија животот. Човечкиот живот не може да биде компензиран со ништо и затоа апелирам сите да се воздржат од обидите за профитерство и од обидите за подгревање на етничките тензии на сметка на овој случај. МВР не може ниту да ги толкува, ниту да ги интерпретира, ниту да ги авторизира изјавите на лицата, вклучително и на осомничениот по однос на нивното видување на настанот. Ние сме должни да ја евидентираме изјавата на осомничениот и тоа е сторено. Тоа е неговото видување  на настанот, меѓутоа нашето видување на настанот е дека е случено кривично дело убиство и таква пријава е поднесена“, изјави министерката Јанкулоска.

Министерката, исто така, апелира и на трпение за да се сочекаат исказите на другите евентуални сведоци, односно да му се овозможи на судот да даде реална оцена за околностите под кои се случило кривичното дело.

Полицијата не успеала да земе исказ од десетгодишната ќерка на осомничениот, којашто била со него во моментот на инцидентот, бидејќи била во тешка состојба поради претрпениот стрес и не била во можност да даде исказ. Според информациите на МВР,  семејството на осомничениот не се наоѓа во Гостивар, но немаат информации каде е.

Не е земен исказ ниту од другите двајца учесници во инцидентот коишто биле заедно со убиените момчиња.

„До овој момент ние имаме обезбедено изјава од сторителот и тој е предаден на истражен судија. Самиот факт што е поднесена кривичната пријава, практично значи дека истрагата односно оној кој го води случајот во моментот е истражениот судија, но на негово барање или на барање на обвинителот ние продолжуваме да бидеме ангажирани во насока на обезбедување на сите дополнителни докази и искази кои ќе одат во прилог на расчистување на случајот. Во таа смисла и претходно зборував доколку во истрагата се процени дека е потребен исказ од било кое друго лице тој ќе биде обезбеден, вклучително и малолетното дете кое било вклучено во настанот, но и другите лице кои можат да понудат информации по однос на околностите во кои се случил настанот, доказите, во насока на аргументирање на пријавата која ја поднесовме“ вели Јанкулоска.

Во однос на информациите дека полицаецот и претходно имал кривични пријави, министерката вели дека тој бил вработен во полицијата во 2002 година, кога таа нема никаков увид во вработувањата во МВР и додава дека на полицајците им се прават сите потребни здравствени прегледи.

Инцидентот се случи во вторникот околу 13 часот кога започнала расправија меѓу полицаецот, кој тогаш не бил на службена должност и неговите соседи, двајцата убиени, кои се од албанска националност.

Според информациите на МВР, инцидентот се случил кога полицаецот ја земал својата ќерка од училиште и ја враќал дома. Во близина на неговиот дом кога сакал да го паркира своето приватно возило, бил нападнат од четири лица.

Според неговиот исказ, настанала прво вербална расправија меѓу нив, по што полицаецот испукал два предупредувачки куршума во воздух, а потоа со својот службен пиштол пукал кон двајца од напаѓачите.

Повредените биле пренесени во Медицинскиот центар во Гостивар, каде што им подлегнале на повредите.

Полицаецот со своето возило и заедно со својата малолетна ќерка самиот се пријавил во Полициската станица Гостивар./крај/фф