Се враќаат позорникарите од минатото, овој пат како офицери за превениција.

Се враќаат позорникарите од минатото на скопските улици, овој пат како офицери за превениција.

Министерката за внатрешни работи, Гордана Јанкулоска денеска имаше состанок со старешините од секторот за внатрешни работи од Скопје на кои ги финализираа реформите на територијата на Скопје.

Со овие реформи бројот на дежурните полицајци на терен ќе се зголеми за над 50 отсто, а граѓаните ќе имаат можност почесто да комуницираат со полицајците кои ќе се движат во нивната населба.

„Наместо досегашната практика, кога десет полициски станици  работеа со исто работно време и ист интензитет, а за сметка на тоа имавме помал број на дежурни полицајци на терен, овој пат одиме со реорганизација по принципот дежурни полициски станици, каде што за почеток на територија на Скопје ќе имаме три дежурни полициски станици најверојатно Гази Баба, Кисела Вода и Карпош, а останатите полициски станици ќе функционираат на систем на патроли“ изјави Јанкулоска.

Со ова, во текот на ноќта од вкупно 10 ќе работат само трите полициски станици. Останатите полициски станици ќе функционираат двосменски во текот на денот.

Ова следува по барањето на граѓаните да се вратат позорникарите од минатото, поплаките за брзината на реакцијата на полицијата и за можноста за непосредна и директна комуникација со полицијата на терен.

„Ќе овозможиме полициските патроли да бидат онаму каде што се граѓаните и да бидат спремни за брз одговор. Тоа значи дека во услови кога ќе имаме за над педесет проценти повеќе полицајци на терен полицискиот службеник ќе може да стигне на лице место каде што е потребна интервенција или каде што е потребно да се регистрира или направи увид за одреден настан во многу пократок рок“ вели Јанкулоска./крај/фф