Македонија
Нови инциденти во автобуси – давен возач на ЈСП, повредени девојки

Со најтешки повреди завршил возачот кој бил задржан во болница. Момчињата кои го нападале се обиделе да го задават.
За неколку часа во Скопје се случија два нови тешки инцидента во автобусите на ЈСП. Момчиња нападнале млади луѓе и возач на автобус. Со најтешки повреди завршил возачот кој бил задржан во болница. Момчињата кои го нападале се обиделе да го задават. Првиот инцидент се случил во средата навечер околу 20 часот на автобуска постојка во населбата Кисела Вода. Додека стоел автобусот со број 58 упаднале неколкумина машки лица облечени со дуксери и префрлени капи на главите. Почнале да дивеат во автобусот и како што соопшти полицијата без повод или причина натепале две лица од село Чифлик и едно од Сопиште. Повредените од Чифлик се машко и девојче на 18-годишна возраст како и жена од Сопиште. Насилниците искршиле стакло од автобус и побегнале. По неколку часа се случило големо насилство, исто така, во автобус на ЈСП. На автобуска постојка на улица „Цветан Димов“ спроти трговскиот Чаирчанка, десетина млади упаднале во автобус со број 57. Внатре биле момче и девојка. Насилниците се нафрлиле врз момчето и се обиделе да го истргаат од автобусот надвор на постојката. Во тоа за среќа не успеале а во меѓувреме возачот на автобусот почнал да вози. Дрските насилници не се откажале и сите десетина трчале по автобусот до следната постојка. Тука повторно упаднале и почнале да кршат. Еден од нив му се нафрлил на возачот и со двете раце се обидел да го задави. По неколку минути дивеење и кршење на автобусот напаѓачите побегнале, а возачот и патниците биле однесени во болница. Поради сериозните повреди возачот е задржан на лекување, а другите се пуштени на домашна нега. Полицијата трага по дрските насилници кои напаѓаат по автобуси и најавува дека брзо ќе бидат пронајдени и случаите ќе бидат расчистени./крај/мф/км
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЦУК: Пожарот во Самоков веднаш изгаснат, објектите на фабриката не беа во опасност

Пожарот во Самоков е локализиран и веднаш изгаснат. Во ниту еден момент немаше опасност од негово ширење кон објектите на фабриката Самоков, соопшти Центарот за управување со кризи.
Од РЦУК Македонски Брод претходно стигна информација дека е настанат пожар во населбата Самоков, во фабриката „Сувенир“, а опожарен е магацин со хемикалии. Во информацијата беше наведено дека електричната енергија во фабриката е исклучена.
Македонија
„Седи Боби, кец!“, му рече Арсовска на Стефковски за проблемот со водата, па доби одговор

Градоначалничката на Град Скопје, Данела Арсовска, преку објава на својот официјален профил на Фејсбук, му возврати на градоначалникот на општина Гази Баба, Бобан Стефковски, кој претходно ги прозва Градот и ЈП „Водовод и канализација“ – Скопје, за прекините во водоснабдувањето во неколку скопски населби. Тој побара итна интервенција од Градот, предупредувајќи на можни протести ако состојбата не се реши веднаш.
Арсовска му одговори на Стефковски дека и по три години на функција сè уште не прави разлика што е во надлежност на Градот, а што на Општина Гази Баба. Таа појасни дека жителите на Црешево и Смилковци не се корисници на ЈП „Водовод и канализација“, туку на ЈКП „Гази Баба“ – претпријатие под општинска надлежност.
„Ова по три години ќе го знаеше ако паузираше еден ден од сликање по фолклорни манифестации за да сработиш нешто“, напиша Арсовска, посочувајќи дека со средствата добиени од владите на Ковачевски и Мицкоски, Стефковски можел да изгради нова водоводна мрежа за тие населби.
Во продолжение, Арсовска рече дека Град Скопје во изминатите три години не добил ниту еден денар од централната власт, а дека Владата ѝ должи на ЈСП Скопје осум милиони евра.
Градоначалничката ја заврши објавата со саркастичен тон: „Седи Боби, кец!“
Ситуацијата дополнително ја заостри реториката меѓу градоначалниците на Скопје и Гази Баба, отворајќи нова рунда меѓусебни обвинувања. По објавата на Арсовска, повторно се огласи Стефковски кој и’ одговори дека надлежноста за Смилковци и Црешево ја знае многу добро, па ја повика да каже зошто жителите од Автокоманда, Железара, Триангла, Маџари и Ченто немаат вода? За крај по однос на делењето оценки, Стефковски на социјалните мрежи напиша дека граѓаните и’ дале оценка на парламентарните избори на Арсовска. Тогаш таа освои вкупно 3.438 гласови.
Македонија
Гори кај Прилеп, Македонски Брод, Чашка и Велес – пресек на состојбата со пожарите

На територијата на државата се евидентирани вкупно осум пожари на отворен простор, од кои активни се четири, соопшти Центарот за управување со кризи.
Во Општина Прилеп, гори кај селото Бешиште. Се работи за приземен пожар во квалитетна мешана шума. Активен е пожарот и кај Општина Македонски Брод, с. Црешнево, м.в. Церо Поле – пожар во деградирана дабова шума и грмушки. Во Општина Чашка беснее шумски пожар под Солунска Глава, помеѓу местата викани Изворите на Бабуна и Бабина Дупка (моментално нема активен пламен, само чад на карпест дел). Во Општина Велес пожарот избувна во ниска вегетација.
Изгаснати се 4 пожари: Општина Врапчиште, с. Врањовци – ниска вегетација, ѓубриште; Општина Липково, с. Лојане – ниска вегетација и стрниште; Општина Карбинци, с. Радање – блок (површина) посеана со жито и ниска вегетација и ОпштинаАрачиново, с. Орланци – ниска вегетација и отпаден материјал.