Три грант-договори во висина од 183.498 евра доделува Јапонија на неколку македонски општини во рамки на Јапонската грант помош за цивилна безбедност.

Три грант-договори во висина од 183.498 евра доделува Јапонија на неколку македонски општини во рамки на Јапонската грант помош за цивилна безбедност.

В понеделник во Јапонската Канцеларија за врски во Скопје ќе бидат потпишани договорите меѓу Јапонската Амбасада во Виена и локалните институции, приматели на помошта, чија цел е унапредување на социјално-економскиот развој во Македонија, како и добрите односи помеѓу двете земји.

Првиот проект, во вредност од 65.128 евра се однесува на реновирање на прозорци и врати за основното училиште „Владо Кантарџиев“ во општина Гевгелија. Прозорците и вратите на училиштето и фискултурната сала се поставени во 1983 година, кога училиштето било изградено. Целта на овој проект е децата да бидат школувани во поволни услови.

Вториот проект, вреден 64.061 евра, ќе биде наменет за поставување на противпожарни хидранти во Пелагонискиот регион. Регионот има пет противпожарни единици. За да се справат со пожарите, пожарникарите ги користат противпожарните хидранти, кои се раштркани низ регионот. Меѓутоа, Пелагонија е простран регион во кој недостигаат доволен број на противпожарни хидранти, поради што проширувањето на хидрантската мрежа стана приоритетно прашање. Целта на овој проект е да се подобри капацитетот за справување со пожари и да се гарантира противпожарната безбедност во Пелагонискиот регион, поради што ќе бидат поставени 140 противпожарни хидранти. Помошта е наменета за општините Битола, Прилеп, Крушево, Демир Хисар, Ресен, Могила, Новаци, Кривогаштани и Долнени.

Третиот проект, вреден 54.309 евра е наменет за унапредување на условите во Институтот за рехабилитација на деца и младинци со посебни потреби во Скопје. Овој институт е единствената јавна институција за луѓе со ваков тип на потреби во Македонија, која нуди образование и професионална обука. Институтот се состои од училиште и интернат каде што учениците ги поминуваат деновите заедно. Интернатот е стар, особено тоалетите, тушевите и мијалниците кои што се сериозно оштетени и во нехигиенска состојба. Целта на проектот е овозможување на соодветни услови за живот на оваа категорија ученици преку набавка на нови тоалети, тушеви и мијалници за потребите на овој институт.

Грант-договорите ќе бидат потпишани во 13:00 часот во Јапонската Канцеларија за врски во Скопје. /крај/со/ач