Македонија
28 јануари техничка влада, 28 февруари распишување на изборите доколку датумот е 8 мај, вели Џафери

Доколку партиите се договорат претседателските и парламентарните избори да бидат заедно и датумот да биде 8 мај, претседателот на Собранието, Талат Џафери, вели дека изборите треба да бидат распишани до 28 февруари, а во согласност со пржинскиот договор техничката влада треба да биде избрана еден месец претходно, односно до 28 јануари. Тој денес на брифинг со новинарите даде појаснување за роковникот.
„Ако се претпостави она што се шпекулира дека 8 мај би бил прифатлив за сите изборите да бидат заедно, претседателските и парламентарните, тогаш роковите се во рамките на минимум 70 и максимум 90 дена од распишување до одржување на изборите, во тој случај тие би се распишале 27-28 февруари. Ако изборите се одржат заедно, значи на 8 мај, како резултат на пржинскиот договор техничка влада би требало на крајот на јануари да е избрана. Значи на 27, 28 јануари да се избере техничка влада. Тоа се роковите во однос на она што би бил конкретниот датум за избори доколку е 8 мај. Појасно, само здравје“, рече претседателот на Собранието, Џафери.
Нагласи дека политичките партии во Собранието заеднички треба да го изберат датумот во рамките на она што го пропишуваат Уставот и законите, односно да се внимава на обврските од последните 60 дена од претседателските и 90 дена од парламентарните избори и на мандатите на двете институции.
Џафери претходно им даде рок на партиите до Нова година се усогласат и да изберат датум за изборите и најави дека ако дотогаш не се договорат тие, датумот за претседателските избори ќе го одреди тој.
Минатата недела и опозицијата и Владата во одвоени изјави посочија дека мај е соодветен период за заеднички, претседателски и парламентарни избори, но официјален договор сè уште нема.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Бројот на вработени намален за 17.000 – погубни економски политики на ВМРО-ДПМНЕ

Фрапатни се податоците кои покажуваат дека по доаѓањето на ВМРО-ДПМНЕ на власт во 2024 година во земјава има над 17.000 помалку вработени, обвини СДСМ.
Според партијата, тоа е директен резултат на погубните економски политики, хаосот и несигурноста, како и напуштање на политиките кои ги востастави СДСМ за стабилна и одржлива економија.
„Со оваа неспособна Влада: пазарот на труд се стеснува, продуктивното население е разочарано и заминува, Фондот за пензиско осигурување е под притисок, бидејќи денес 1,63 вработени обезбедуваат една пензија, наместо 1,74 како што беше пред само една година. Владата нема стратегија, нема визија, нема мерки за задржување и отворање на нови работни места“, велат од СДСМ.
Од таму обвинија дека ова се последици од владеењето на Мицкоски и дека се зголемува несигурноста за младите, пензискиот систем се доведува во ризик, а приватниот сектор е оставен сам да се снаоѓа.
Македонија
Регионална иницијатива за превенција од пожари на Западен Балкан

Во услови на зголемени ризици од пожари, започна регионална иницијатива за подигање на свеста за управување со пожари на ниво на предел во земјите од Западен Балкан. Иницијативата, поддржана од Министерството за земјоделство, шумарство и водостопанство, има за цел да го поттикне интегрираното и одржливо управување со екосистемите, наместо традиционалниот пристап што се фокусира исклучиво на гаснење.
Пожарите оставија сериозни последици врз природата, економијата и животот на граѓаните, а над 90% од нив се предизвикани од човечка невнимателност — факт што укажува дека превенцијата е клучна.
Преку интерсекторска соработка, јакнење на локалните капацитети и активности на терен, иницијативата тежнее да создаде предели и заедници отпорни на пожари.
„Природата е наша заедничка одговорност. Со здружени напори можеме да постигнеме нула пожари предизвикани од човечки фактор,“ велат од Министерството.
Македонија
Гром го предизвикал пожарот во велешката фабрика, велат од „Мирана“

Удар од гром е причината за пожарот што синоќа избувна во дел од производствениот погон на „Биокосмос“ во Велес, информираат од компанијата „Мирана“ преку официјално соопштение.
Од ударот се оштетени дел од просториите на „Биокосмос“ и, како што посочуваат од таму, тие привремено ќе бидат надвор од употреба додека не се санира штетата.
Фабриката „Мирана“, која се наоѓа во истиот индустриски комплекс, не била зафатена од пожарот и производствениот процес таму продолжува непречено.
Во пожарот нема повредени лица.
Центарот за управување со кризи претходно денес информира дека пожарот бил целосно локализиран рано утрово, околу 4 часот. Според информациите на ЦУК, огнот зафатил магацински простор со фрижидери и канцеларии со документација, а на неколку места сè уште се забележува слабо чадење.
Иако пожарот е ставен под контрола, службите сè уште се на терен за да спречат повторно разгорување, со оглед дека на одредени локации сè уште се јавуваат чадења.