Агенцијата за млади и спорт и компании спонзори организираат бесплатен аранжман за следење на натпреварите на македонската ракометна репрезентација на квалификацискиот турнир за пласман на Олимписките игри во Лондон, кој ќе се одржи во Гетеборг, Шведска од 6 до 8 април 2012 година.

Предвиден е организиран аранжман за 500 лица, од кои 400 лица ќе бидат избрани по пат на лотарија, а 100 лица ќе бидат претставници на навивачките групи од Македонија.

Лицата кои сакаат да конкурираат за избор преку методологијата на лотарија, треба да поднесат електронски пријави на веб страницата www.ovaemakedonija.mk каде постои унифициранa апликација за конкурирање.

Во рамките на апликацијата на пријавата, заинтересираните лица треба да ги поднесат следните податоци: име и презиме, број на патна исправа-пасош, контакт телефонски број и email адреса.

Процесот на конкурирање започна синоќа и ќе трае до утре до 18:00 часот. Извлекувањето на лицата кои конкурираат за добивање на аранжманот и учество во навивачката експедиција ќе се изврши во рамките на специјално организирана емисија на Македонската радио-телевизија која ќе се емитува утре на првиот програмски сервис со почеток во 20:00 часот.

Аранжманот вклучува бесплатна карта за организиран автобуски превоз на релација Скопје – Гетеборг , бесплатен престој во сместувачки капацитети во Гетеборг, Шведска, кое вклучува две ноќевања со појадок и бесплатни влезници за натпреварите кои македонската ракометна репрезентација ќе ги одигра со Унгарија, Шведска и Бразил./крај/со/фф