Разочарани сме од ниските казни, вели Нонка Станкова, една од преживеаните во трагедијата на бродот „Илинден“ во Охридското езеро за Бугарското Национално радио, пренесува Бгнес.

“Виновниците се утврдени, а толку долго се одолжуваа работите. На следната инстанца што да очекуваме, можеби ослободувања“, праша Нонка Станкова.

Таа раскажува дека во селото Антон секој го носи ужасот од несреќата.

„Се обидувате да заборавите, но неуспешно. Луѓето се повредени за цел живот“, рече Станкова.

Според неа, преживеаните по трагедијата уште не презеле никакви активности, бидејќи сакаат прво да биде утврден виновник.

„Не може едно момче на 23 години да е капетан иако е израснат до езерото. И другиот виновник е компанијата која дала дозвола бродот да патува“, рече Нонка Станкова.

Според Владимир Владимиров, адвокат на роднините на загинатите во Охридското Езеро, пресудата донесена во судот во Битола е скандалозна и неправедна, бидејќи количината на казната не одговара на степенот на вината.

„Да, затворот е погоден за виновниците, но бројот на пресудените години не одговара на злосторството. Тоа е еден од најголемите трагични случаи поврзани со превоз во Европа“, заклучи адвокат Владимир Владимиров.

Претходно, Апелациониот суд во Битола ги потврди казните за Сотир Филевски и Бранко Баиќ во случајот за потонувањето на бродот „Илинден“ во Охридското езеро на 5-ти септември 2009 година, кога загинаа 15 бугарски туристи.

На 5 јули минатата година Основниот суд во Охрид ги прогласи за виновни двајцата обвинети. Капетанот на бродот Филевски и хрватскиот државјанин Баиќ, кој дал сертификат за состојбата на бродот, беа осудени на по една година затвор. Судот смета дека Сотир Филевски не се придржувал кон прописите за превозот и лекомислено сметал дека нема опасност да качи на бродот над 50 бугарски туристи. Поради непочитување на Законот за превозот беше осуден и Баиќ.

Според судот, и тој пристапил лекомислено кога ја вршел работата, но, според судскиот состав, експертот не издал документ со кој се ограничува бројот на патниците.

Можноста, која останува пред страните во кривичното дело е да поднесат жалба пред Врховниот суд во Скопје.

„Пред еден месец се очекуваше семејствата на удавените 15 Бугари да добијат по 4.500 евра од осигурување, кои се уште не се исплатени“, раскажуваат блиски на загинатите, пренесува Бгнес.

Продолжува да се бара можност надомест да плати и фирмата „Лојд“ која дала сертификат за бродот. Истрагата, која Бугарија води за случајот, исто така продолжува. /крај/бг/ач