Членовите на Советот за радиодифузија (СРД) нема веќе да се доусовршуваат, дообразуваат и специјализираат со парите на граѓаните и радиодифузерите.

На денешната седница членовите на СРД го укинаа правилникот за стручно  усовршување, дообразување и специјализација на членовите на СРД, по препорака на Државниот завод за ревизија.

Повеќето членови на Советот беа за укинување на овој правилник, но дел беа на ставот дека на членовите на СРД им треба постојано усовршување.

„Укинувањето на овој правилник ќе биде добар потег на Советот. Тоа ќе биде добар пример за останатите регулаторни тела, за останатите тела кои одлучуваат како Собранието, Владата, Министерствата, агенциите“ изјави Лазо Петрушевски, член на СРД.

„Неморално и неетички е ние самите да гласаме овде и меѓу себе да си доделуваме средства за стручно усовршување“, вели Зоран Трајчевски, член на СРД.

„Сметам дека сите доаѓаме тука како образовани кадри и сметам  дека нема потреба ние како членови на Советот да се дообразувавме, односно да користиме средства од  граѓаните, од радиодифузерите, кои уредно  плаќаат“ изјави Борче Арсов, член на СРД.

Професорот Томе Груевски смета дека овој правилник треба да остане, но врз него да се направат одредени модификации.

„Овој правилник го чувствувам како свој. Јас доаѓам од факултет и ние го предложивме овој правилник, не за членовите на Советот, туку за сите вработени во Советот. Јас мислам дека нема институција кај што нема такви правилници за стручно усовршување, за помагање на одредени колеги кои сакаат да се доусовршуваат. Од таму сум на став да остане таков правилник не само кај нас, туку во сите институции“, рече Томе Груевски, член на СРД.

Не е точно дека ние немаме потреба од било какво доусовршување. СРД  тоа треба да им  овозможи на вработените и членовите на СРД“ смета претседателот на СРД, Зоран Стефановски.

Советот расправаше и по нацрт – извештајот од Државниот завод за ревизија за извршената ревизија на финансиските извештаи и ревизија на усогласеност на Советот за радиодифузија и на менаџерскиот извештај на Државниот завод за ревизија за 2010 година.

Според претседателот Стефановски, стручните служби го разгледале извештајот и смета дека не се констатирани големи грешки во работата на СРД.

„На сите останати забелешки, СРД ќе одговори со тоа што ќе ги испочитува во најкраток можен рок забелешките препораките кои ги дава оваа институција. Забелешките беа поделени во неколку групи од правен аспект, од аспект на финансиско-економско работење, проектите од јавен интерес“ рече Стефаноски.

Ова беше последна седница со која претседаваше Стефаноски. На  18 април, по големиот христијански празник, Велигден истекува неговиот шестгодишен мандат.

За изборот на новиот претседател е потребно мнозинство гласови од вкупниот број членови на Советот, што значи од вкупно 15, за избор се потребни најмалку осум гласови. Заедно со актуелниот претседател Стефановски, мандатот им истекува на уште двајца членови на Советот, Али Алиу и Томе Груевски./крај/фф