Со донесувањето на новиот Закон за лустрација, први на тапет на седницата се најдоа старите кодоши.

Комисијата за верификација на фактите повторно поведе постапка за Владимир Милчин и уште осум други функционери кои со стариот закон беа веќе прогласени за кодоши, но откако Уставниот суд укина некои одреди од стариот Закон  за лустрација, Управниот суд по автоматизам ја укина одлуката на Комисијата.

Претседателот на Комисијата, Томе Аџиев вели дека бидејќи овие предмети биле „чисти“ затоа почнале првин со нив, додека за другите членови, предложени од опозицијата, оваа одлука на Комисијата е неуставна.

„Одлучивме да се поведе постапка за овие лица. Овие предмети се „чисти“ веќе ни се проверувани и затоа ги обработивме прво нив“ вели Аџиев.

Јанакие Витановски, член на Комисијата го нарече претседателот на Комисијата „нелегитимен, вечен и претседател на кој му е поминат мандатот“.

„Никој не може да биде суден за дело за кое веќе има правосилна одлука. Според Уставот не се суди два пати за исто дело“ рече Витановски.

Се прашуваат зошто на претседателот му се брза толку за овие предмети кога имало уште 5.000 други готови предмети за поранешни функционери.

Чедомир Дамјановски, член на Комисијата исто така смета дека ова оваа одлука е против одлуката на Уставниот суд и дека Законот се става над Уставот. Тие поднеле и писмено барање експерти по Уставно право да им помогнат за да ги надминат разликите, но претседателот не прифатил.

Новиот Закон за лустрација стапи на сила во вторник, а овој закон предвидува имињата на соработниците на тајните служби да бидат јавно објавени, нивните досиеја, документите и службените белешки. И покрај тоа што Уставниот суд ги укина одредбите кои предвидуваа лустрација за поранешни функционери, припадници на невладини организации.

Законот ќе го опфаќа периодот до 2006 година, односно од примената на Законот за слободен пристап до информации. Новина е лустрирањето на лицата кои стекнале капитал во претпријатија со општествена сопственост, согласно Законот за трансформација на претпријатијата со општествен капитал.

Новинарите, верските лица, невладините организации и членовите на политичките партии со новите одредби немаат обврска да поднесат изјави до Комисијата за лустрација.

Обврска за поднесување изјава до Комисијата ќе имаат сите поранешни и актуелни носители на јавни функции, Претседателот на државата, премиерот, министрите, пратениците, судиите, јавните обвинители, Народниот правобранител, адвокати, нотари, медијатори, директори на јавни претпријатија, членовите на МАНУ, воените лица, вработени во високо образовните институции./крај/фф