Заклучно со 30-ти септември, недела истекува рокот, до кога телевизиите Сител и Канал 5 и радиото Канал 77 требада ја трансформираат сопственоста на радиодифузерите.

Според член 11 од Законот за радиодифузија, носители на јавни функции и членови на нивни семејства не можат да вршат радиодифузна дејност.

„Политички партии, државни органи, органи на државна управа, јавни претпријатија, единици на локална самоуправа, носители на јавни функции и членови на нивните семејства, не можат да вршат радиодифузна дејност ниту да бидат основачи, соосновачи или да стекнуваат учество во сопственоста на радиодифузерите“, се вели во член 11.

Пратеникот Љубисав Иванов Ѕинго изминатава седмица недела си поднесе оставка од пратеничката функција и со ова го реши проблемот со телевизија Сител, којашто е во сопственост на неговиот син.

Иако Ѕинго, како што изјавија од неговата партија останува претседател на Социјалистичката партија на Македонија, од СРД велат дека со тоа не се прекршува законот, бидејќи во сегашниот Закон во член 11 не стои дека лидери на политички партии не можат да бидат сопственици на медиуми, туку само политички партии. Според нив, тоа  правно гледано не било спорно.

Горан Гаврилов, сопственик на радиото Канал 77, чија сестра е пратеник од СДСМ, пред неколку дена достави барање за измена на сопственичката структура, односно 80 отсто од радиото му го препиша на синот, а 20 отсто на сопругата. Но Советот за радиодифузија го одби ова барање оти станувало збор за блиски лица од семејството.

Телевизија Канал 5, како и другите радиодифузери, има две опции, едната е да пристапи кон промена на сопственичката структура или носителот на јавната функција да поднесе оставка. Засега нема најави од телевизијата, освен шпекулации дека телевизијата добила нов сопственик.

СРД следната недела ќе има седница, на која доколку медиумите не достават документација, радиодифузерите ќе почнат постапка за одземање на дозволата. /крај/мф/фф