Министерството за здравство информира дека во четврток извршило проверка на начинот на внесување во системот за плаќање по успешност во осум јавни здравствени установи, во кои тимовите од Министерството извршиле споредба на внесот на податоци со болничките дневници во овие ЈЗУ.

„Општа констатација при проверката е дека во одредени случаи има поголем број евидентирани интервенции од сработеното (не се внесувани за да не се наруши учинокот на останатите), додека во други се внесени повеќе интервенции во системот од оние што можат да се најдат во медицинската документација“, се вели во соопштението од Министерството за здравство.

Подрастичен пример е забележан кај доктор-специјалист од универзитетска клиника за хируршки болести „Св. Наум Охридски“, кој во електронската апликација за плаќање по успешност внел дури 837 интервенции, а во болничкиот дневник биле запишани 137 извршени интервенции од истиот доктор.

Истиот лекар евидентирал 61 отпусно писмо за минатиот месец, а констатирано е дека на цел оддел воопшто немало толкав број испишани пациенти.

Во попладневните часови, во четвртокот, кај овој доктор забележана е екстремно намалување на бројката наизвршени интервенции, односно лекарот ги избришал претходно евидентираните услуги и од вкупно 837, во 18 часот се останати само 41 услуга,

Друг покарактеристичен пример за неправилно внесување на податоци е за докторка од Клиниката за очни болести, која впишала дека е извршена витректомија кај пациент, што носи 2,5 бода.

„Ваква интервенција во болничкиот дневник воопшто не е евидентирана, а докторката не ја работи оваа интервенција и не се води како извршена на ниво на цела клиника“, информираат од МЗ.

Кај доктори од оваа клиника, забележано е дека внесувале податоци за извршена фако метода, која носи 1.500 бодови, а реално на пациентите им била извршена класична интервенција од илјада бодови, со што добивале 500 бодови повеќе од предвиденото за секоја интервенција.

Исто така, на Клиниката за детска хирургија, каде во системот била впишана интервенција за кила, наводно направена кај дете помало од 1 година, која носи илјада бодови, но овој вид интервенција воопшто не е најдена како извршена во главната оперативна книга во оваа здравствена установа.

Од Министерството за здравство велат дека продолжуваат со контролите на терен и дека опомена ќе добијат лекарите и здравствените установи кај кои ќе бидат утврдени одредени неправилности во електронската апликација за внес на податоци во системот за плаќање по успешност./крај/со/бб